Toshkentda bo‘lib o‘tgan O‘zbekiston–Finlyandiya sammiti xotirasi yuzasidan samimiy va ramziy tadbir tashkil etildi. Prezident Shavkat Mirziyoyev hamda Finlyandiya rahbari Aleksandr Stubb Ko‘ksaroy qarorgohida joylashgan Faxriy mehmonlar xiyobonida birgalikda daraxt ekish marosimida ishtirok etdi, deb xabar berdi Prezident matbuot xizmati.
Bu marosim ikki davlat o‘rtasidagi do‘stlik, o‘zaro anglashuv va ishonchning ramzi sifatida o‘tkazildi. Shu bilan birga, u O‘zbekiston va Finlyandiya o‘rtasidagi ko‘p qirrali hamkorlikni mustahkamlash yo‘lidagi intilishni ifoda etdi.
31-oktyabr kuni Finlyandiya prezidenti Aleksandr Stubb O‘zbekistonga rasmiy tashrif bilan keldi. Ko‘ksaroy qarorgohida uni tantanali kutib olish marosimi bo‘lib o‘tdi. Shavkat Mirziyoyev va Aleksandr Stubb rasmiy delegatsiyalar ishtirokida muzokaralar o‘tkazdi. Suhbat chog‘ida siyosiy, iqtisodiy, ta’lim, ekologiya va “yashil energetika” sohalaridagi hamkorlikni kengaytirish masalalari muhokama qilindi.
Uchrashuv yakunida ikki davlat rahbarlari Qo‘shma bayonotni imzolashdi. Hujjatda O‘zbekiston va Finlyandiya o‘rtasidagi hamkorlikni yangi bosqichga olib chiqish, savdo aylanmasi va investitsiya loyihalarini ko‘paytirish, ta’lim va ilmiy tadqiqotlar sohasida qo‘shma dasturlarni amalga oshirish masalalari belgilab berilgan.
Prezidentlar tomonidan ekilgan daraxt hamkorlikning yangi davri boshlanganidan dalolatdir. Bu tadbir nafaqat ramziy, balki ekologik ma’noga ham ega — ikki davlat tabiatni asrash va yashil kelajak sari harakat qilishda mushtarak maqsadga ega ekanini ko‘rsatdi.
“Zamin”ni Telegramʻda oʻqing!
