O'zbekiston havo ifloslanishiga qarshi kurashda natija ko'rsatmoqda

Toshkentda 2024 va 2025-yillar noyabr oyining dastlabki o'n kuni davomida havoning sifatiga oid ma'lumotlar tahlili davlat tomonidan ko'rilgan choralar samarasini qisman namoyon qilmoqda. Havo sifati indeksi (AQI) hali ham ba'zi kunlarda xavfli darajaga yetgan bo'lsa-da, o'rtacha ko'rsatkichda pasayish kuzatilgan.

2024-yilning shu davrida AQI o'rtacha 119,8 bo'lgan bo'lsa, 2025-yilda bu ko'rsatkich 109,9 ga tushgan. Ammo ayrim kunlarda, masalan, 2025-yilning 3-noyabrida AQI 176, 9-noyabrda esa 161 ni tashkil qilgan.

Shu bilan birga, 4-noyabrda ko'rsatkich 28 bo'lib, so'nggi yillardagi eng yaxshi natijalardan biri qayd etilgan. Kuz-qish mavsumida havo ifloslanishi aholi hayot sifati uchun jiddiy muammo bo'lib qolmoqda.

Hukumat bu borada qator qonunlar qabul qilib, tizimli yechimlarni amalga oshirishga kirishgan. Xususan, Toshkentda atmosfera havosini yaxshilashga yo'naltirilgan dasturlar ishlab chiqilgan.

Ular orasida "Euro-4" standartidan past bo'lgan yoqilg'ini bosqichma-bosqich taqiqlash hamda neftni qayta ishlash zavodlarini modernizatsiya qilish kabilar mavjud. Shuningdek, Toshkent va uning atrofida katta maydonlarda "yashil zonalar" tashkil etilishi rejalashtirilgan.

2025-yil oktabr oyida sanoat korxonalari va issiqxonalardan chiqayotgan chiqindilarni kamaytirishga qaratilgan yangi chora-tadbirlar taqdim etilgan. Ular orasida zamonaviy chang-gaz tozalash tizimlarini o'rnatish ham bor.

Toshkent hokimiyati huquqni muhofaza qiluvchi organlar bilan birgalikda ekologik reydlar o'tkazib, ayniqsa ko'mir yoqadigan issiqxona xo'jaliklarining qonunbuzarliklarini aniqlashda faoliyatni kuchaytirmoqda. Bu chora-tadbirlar mamlakatning milliy ustuvor yo'nalishi sifatida e'lon qilingan "yashil iqtisodiyot" strategiyasi doirasida amalga oshirilmoqda.

Statistik yaxshilanishlarga qaramay, vaziyat murakkabligicha qolmoqda. Xususan, PM2.5 kabi mayda zarrachalar konsentratsiyasi ba'zi kunlarda Jahon sog'liqni saqlash tashkiloti tavsiyalaridan ancha yuqori bo'lib, bu tasdiqlangan dasturlarni izchil va uzoq muddatli amalga oshirish zaruratini ko'rsatadi.

“Zamin”ni Telegramʻda oʻqing!