Uzun tumani joriy yilda kambag‘allikni qisqartirish va bandlikni oshirish borasida yuqori natijalarga erishgani bois namunaviy hudud sifatida qayd etildi. Tumanga ajratilgan 160 milliard so‘m mablag‘, 70 million dollarlik xorijiy investitsiya va ishga tushirilgan 47 ta yangi korxona tufayli minglab aholi bandligi ta’minlandi. Natijada, tuman kambag‘allik darajasi yil boshidagi 10,5 foizdan 3 foizgacha kamaydi.
Bunga qarama-qarshi ravishda, Denov tumanida ajratilgan mablag‘larning maqsadli sarflanmagani tanqid qilindi. Kambag‘al oilalar reyestriga kiritilgan 1 200 ta oila daromadida hech qanday o‘zgarish qayd etilmagani hokimlik ishining samarasizligini ko‘rsatdi. Tuman Uzunga nisbatan 4,5 barobar ko‘p resurs olgan bo‘lsa-da, natija yetarli bo‘lmadi.
Shuningdek, Chiroqchi tumanida tadbirkorlikni rivojlantirish uchun 309 milliard so‘m kredit resurslari ajratilganiga qaramay, hokimiyat aholiga imkoniyatiga mos tayyor loyihalar taqdim etmagani ta’kidlandi. Bu esa tuman rahbariyati tomonidan ajratilgan mablag‘lardan oqilona foydalanilmaganini ko‘rsatdi.
Ushbu kamchiliklar sabab Denov hokimi I. Abrorov va uning birinchi o‘rinbosari Sh. To‘raqulov hamda Chiroqchi hokimi F. Yusupov va uning birinchi o‘rinbosari Z. Ergashevni lavozimidan ozod etish belgilandi. Mazkur qaror hududlarda ijtimoiy-iqtisodiy dasturlarning amalda to‘liq ijro etilishini ta’minlashga qaratilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
