O‘zbekistonlik Javohir Sindarov tarixiy natijaga erishdi. U FIDE Jahon kubogida g‘olib chiqib, ushbu musobaqani yutgan eng yosh chempion sifatida e’tirof etildi. 19 yoshida qo‘lga kiritilgan bu yutuq nafaqat milliy shaxmat tarixida, balki jahon shaxmat sahnasida ham muhim voqea bo‘ldi.
Sindarovning g‘alabasi ortidan mamlakatda keng miqyosda tabriklar yog‘ildi. Prezident Shavkat Mirziyoyev ham yosh chempionni muborakbod etib, uning g‘alabasini O‘zbekiston shaxmat maktabining yuksak salohiyati va yoshlarning intilishlari natijasi sifatida baholadi.
Musobaqa reglamentiga ko‘ra, Javohir Sindarov chempionlik uchun 120 ming AQSh dollari mukofot puli bilan taqdirlandi. Bu uning xalqaro sport arenasidagi muvaffaqiyatlari yanada oshib borishiga zamin yaratadi.
Javohirning bu g‘alabasi o‘zbekistonlik yoshlar uchun katta ilhom manbai bo‘lib, mamlakatning shaxmatdagi mavqeini yana-da mustahkamladi. Shaxmat ahli va muxlislar Sindarovning keyingi yutuqlarini katta qiziqish bilan kutmoqda.
“Zamin”ni Telegramʻda oʻqing!
