2025 yil 23 dekabr kuni O‘zbekiston Respublikasi tashqi ishlar vaziri o‘rinbosari Olim Abdullayev boshchiligidagi delegatsiya Saudiya Arabistoni podshohligi ichki ishlar vaziri o‘rinbosari Xolid bin Muhammad Al-Battal bilan rasmiy uchrashuv o‘tkazdi. Muloqot ikki tomonlama munosabatlarni yanada chuqurlashtirishga qaratilgan muhim qadam sifatida baholanmoqda.
Uchrashuv davomida ikki davlat rahbarlarining qat’iy va izchil siyosiy irodasi tufayli O‘zbekiston–Saudiya Arabistoni o‘rtasidagi hamkorlik munosabatlari barqaror rivojlanib, yangi bosqichga ko‘tarilayotgani alohida ta’kidlandi. Oliy va yuqori darajadagi o‘zaro tashriflar soni ortib borayotgani esa bu hamkorlikning amaldagi ifodasi sifatida qayd etildi.
Saudiya tomoni O‘zbekistondan podshohlikka tashrif buyurayotgan fuqarolar bilan bog‘liq muammolar soni juda kam ekanini alohida urg‘ulab, o‘zbek xalqiga nisbatan yuksak hurmat va iliq munosabatini bildirdi. Bu esa ikki xalq o‘rtasidagi ishonch va o‘zaro anglashuv darajasi oshib borayotganidan dalolat beradi.
Muzokaralarda Haj va Umra mavsumlarida O‘zbekiston fuqarolarining Saudiya Arabistoniga tashrifini tashkil etish, shuningdek, viza olish jarayonlarini amaldagi qonunchilik doirasida yanada qulay va shaffof qilish masalalariga alohida e’tibor qaratildi. Tomonlar bu yo‘nalishda hamkorlikni kuchaytirish muhim ekanini ta’kidladi.
Shuningdek, uchrashuvda ikki davlat ichki ishlar vazirliklari o‘rtasida faoliyat yuritayotgan qo‘shma komissiya ishini yanada rivojlantirish, fuqarolarning huquq va manfaatlarini himoya qilishga qaratilgan amaliy chora-tadbirlarni birgalikda hayotga tatbiq etish bo‘yicha o‘zaro kelishuvga erishildi.
Mazkur muloqot O‘zbekiston va Saudiya Arabistoni o‘rtasidagi strategik sheriklikni yanada mustahkamlab, amaliy hamkorlik uchun yangi imkoniyatlar ochishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
