O'zbekistonda korrupsiya haqida xabar berganlar himoya orderi bilan qo'llab-quvvatlanadi
O'zbekistonda korrupsiya holatlari haqida ma'lumot bergan fuqarolarni tazyiq va ta'qiblardan asrash uchun himoya orderi joriy etilmoqda. Bu tartib korrupsiyaning oldini olish va unga qarshi kurash tizimini takomillashtirishga qaratilgan prezident farmonida belgilandi. Bu haqda podrobno.uz xabar beradi.
Hujjatga ko'ra, Korrupsiyaga qarshi kurashish agentligi korrupsiya buzilishlari to'g'risida xabar bergan shaxslarga himoya orderi beradi. Mazkur mexanizm ularni ish faoliyati jarayonida bosim o'tkazish va ta'qib qilish holatlaridan himoyalashga xizmat qiladi.
Shuningdek, korrupsiyaga qarshi kurashga hissa qo'shganlarni rag'batlantirish maqsadida “Korrupsiyaga qarshi kurashga qo'shgan hissa uchun” ko'krak nishoni ta'sis etilmoqda.
2026 yil iyunigacha Agentlik Raqamli texnologiyalar vazirligi, Bosh prokuratura, Ichki ishlar vazirligi, Davlat xavfsizlik xizmati hamda Iqtisodiyot va moliya vazirligi bilan birga rag'batlantirish tizimini tartibga soluvchi normativ-huquqiy hujjat loyihasini ishlab chiqadi. Unda “E-Anticor.uz” platformasini Janubiy Koreyaning Clean Portal tajribasi asosida modernizatsiya qilib, rag'batlantirish tizimini raqamlashtirish, jumladan huquqbuzarliklar haqida xabar berganlarni qo'llab-quvvatlash nazarda tutiladi. Bundan tashqari, rag'batlantirish masalalarida Agentlikka muvofiqlashtiruvchi organ maqomini berish hamda tizimni Jamoatchilik nazoratini rivojlantirish jamg'armasi orqali yo'lga qo'yish rejalashtirilgan.
2026 yil 1 iyuldan “Raqamli komplaens” axborot-dasturiy majmuasini sinov tariqasida ishga tushirish ko'zda tutilgan. U korrupsiyaning oldini olish klasteri ishtirokchilari o'rtasida tezkor axborot almashinuvini ta'minlashi, ichki antikorrupsiya bo'linmalari ishini “E-Komplaens” moduli orqali to'liq raqamlashtirishi kerak.
Farmon Agentlikka davlat organlari va tashkilotlariga qoidabuzarliklarning oldini olish hamda ularni bartaraf etish bo'yicha ko'rib chiqilishi majburiy bo'lgan tavsiya va takliflarni kiritish huquqini ham beradi.
Eslatib o'tamiz, O'zbekistonda korrupsiyaning oldini olish bo'yicha klaster ishlash tartibi ham tasdiqlangan. Ushbu tizim davlat idoralari, huquqni muhofaza qiluvchi tuzilmalar, fuqarolik jamiyati institutlari va ilmiy tashkilotlar o'rtasida korrupsiyaga qarshi yo'nalishda izchil hamkorlikni yo'lga qo'yishga qaratilgan.
“Zamin”ni Telegramʻda oʻqing!
