2025 yil yakunlariga ko‘ra, Toshkent O‘zbekistonda aholining daromadlari eng yuqori bo‘lgan shahar maqomini saqlab qoldi. Poytaxtda o‘rtacha oylik nominal ish haqi 10,3 million so‘mga yetdi, deya ma’lum qildi Milliy statistika qo‘mitasi. Bu haqda podrobno.uz xabar beradi.
Daromadlar o‘sishi hududlarda ham sezilarli bo‘ldi. Xususan, Namangan viloyatida ish haqi 22,8% ga, Sirdaryoda 20,8% ga, Jizzaxda 20,5% ga oshdi. Eng past o‘sish Andijon viloyatida qayd etilib, ko‘rsatkich 13,4% ni tashkil etdi.
Mamlakat bo‘yicha o‘rtacha oylik nominal hisoblangan ish haqi (dastlabki ma’lumotlarga ko‘ra) 6,38 million so‘mga yetgan.
Tarmoqlar kesimida eng yuqori maosh moliya sektorida saqlanib qolmoqda: bank, sug‘urta va lizing yo‘nalishlari xodimlari o‘rtacha 17,59 million so‘m oladi. So‘nggi besh yilda bu sohada daromadlar qariyb ikki baravar oshgani qayd etildi.
IT yo‘nalishi ham sezilarli sakrash ko‘rsatdi: axborot va aloqa sohasidagi mutaxassislar daromadi besh yil davomida 9,7 million so‘mga ko‘payib, bu tarmoqni maoshlar bo‘yicha ikkinchi o‘ringa olib chiqdi.
Uzoq muddatli o‘sish bo‘yicha kuchli uchlikni transport va logistika sohasi yakunlaydi. Bu yo‘nalishda o‘rtacha ish haqi 2021 yil ko‘rsatkichlariga nisbatan 5,4 million so‘mga oshgan.
So‘nggi bir yildagi o‘sish sur’atlari orasida esa san’at, ko‘ngilochar va dam olish sohasi ajralib turdi. Hali ham yetakchi tarmoqlardan ortda bo‘lsa-da, bu yo‘nalishda ishlovchilarning daromadi chorakdan ko‘proq oshib, 5,44 million so‘mga yetdi.
“Zamin”ni Telegramʻda oʻqing!
