Oshqovoq palagida o‘sgan bodringni ko‘rganmisiz? Toshkent davlat agrar universiteti dosenti Salohiddin Yunusov oshqovoq poyalarida bodring etishtirdi, deb yozdi O‘zA.
– Kasbim taqozosi bilan dehqonlar va fermerlar bilan tez-tez uchrashib turaman, – deydi S.Yunusov. – Ular kasalliklarga chidamli, serhosil, eksportbop navlarni so‘rab-surishtirishadi. Albatta, dehqon ne mashaqqatlar bilan erga urug‘ qadaydi, parvarish qiladi. Agar ekin hosilga kirmasdan poyasi sarg‘ayib, kasallansa, qanchadan-qancha mehnat chippakka chiqadi. Shunda qovoqni bodringga payvand qilish va bunda ularning ekish muddati va poyasining diametriga e’tibor qaratdik. Bodring qovoqgullilar oilasiga mansub bir yillik ekin bo‘lib, qovoq esa nisbatan qurg‘oqchilikka va kasalliklarga chidamli bo‘lganligi tufayli ularni payvandlash mumkin. Bunda qovoqning bir qancha nav namunalari va bodringning "O‘zbekiston – 740" navi o‘rganildi.
Payvandlash usulida ko‘chatlarni parvarishlash katta e’tibor talab qiladi. Payvandlangan o‘simliklarning kesilgan joyi bitgunga qadar maxsus himoyalangan joyda havo namligini 90-95 foiz va havo haroratining kunduzi 20-25 daraja, kechasi 16-19 daraja bo‘lishini ta’minlash uchun 4-6 kun davomida nazorat qilib turiladi. Payvandlangan ko‘chatlar bodring etishtirish agrotexnik tadbirlari asosida parvarishlanadi. Bunda ko‘chatlar ochiq maydonga qo‘sh qator qilib, lentasimon usulda ekiladi.
– O‘tgan yili mana shu payvandlangan bodring ko‘chatidan ekkanmiz, – deydi Andijon viloyati Asaka tumanidagi «Samar agro zavod» mas’uliyati cheklangan jamiyati rahbari Bahodir Ahmedov. – Rostini aytsam, avvaliga bu usulda bodring etishtirishdan biroz cho‘chiganman. Qanday bo‘lar ekan? Shuncha mehnatga kuyib qolmasmikanman, degan xayolga borgandim. Ammo bir gektardan o‘ttiz besh tonna hosil olib, hosildorlikdan ko‘zlarim quvnadi. Ilgari oddiy usulda bodring etishtirib, gektariga yigirma, yigirma besh tonna hosil olardik. Ba’zida poyasi tez sarg‘ayib, kasallanishi oqibatida yana ham kam hosil bo‘lardi. Bu bodring poyasi yozning issig‘iga chidamli, yuqori hosildorligi, mazali ta’mi hamda uzoq muddatgacha yaxshi saqlanishi bilan bizga ma’qul bo‘ldi. Joriy yilda uch gektarda payvandlangan bodring ekamiz. Hozirdanoq ko‘plab zavodlar bilan shartnomalar imzolaganmiz.
– Kasalliklarga chidamli, mahalliy iqlim sharoitiga mos, serhosil, ertapishar navlarni yaratish va resurstejamkor etishtirish texnologiyalarini ishlab chiqish olimlarimiz faoliyatining asosini tashkil etadi, – deydi S.Yunusov. – Keyingi yillarda universitetimiz olimlari bodringning ochiq maydon uchun oltita, himoyalangan maydonda etishtirish uchun to‘rtta yangi navini yaratdi.
O‘zbekistonda etishtirilgan meva-sabzavotlar dunyoda vitaminlarga boyligi bilan dovrug‘ qozongan. Avstriya fermerlar tashkiloti tomonidan chop etiladigan “Bio Austria” jurnalida O‘zbekiston ekologik toza mahsulotlar etishtirish borasida ulkan salohiyatga ega ekanligi alohida ta’kidlangan. Unda ushbu sohani yanada rivojlantirish uchun qo‘shma loyihalarni hayotga tatbiq qilish zarurligi qayd etilib, avstriyalik sarmoyadorlarning e’tibori O‘zbekiston agrosanoat taraqqiyotiga qaratilgan.
Mamlakatimiz qishloq xo‘jaligida amalga oshirilayotgan islohotlar samarasida oziq-ovqat ekin maydonlari kengaytirilib, ularning parvarishida organik, biologik va mahalliy o‘g‘itlardan foydalanilmoqda. Hatto qayta ishlash, saqlash jarayonida ham sun’iy qo‘shimchalar qo‘shilishiga yo‘l qo‘yilmaydi. Bundan ko‘zlangan asosiy maqsad bitta: tabiiy va ekologik toza mahsulotlar etkazib berishni ko‘paytirish, tarmoqning eksport salohiyatini yuksaltirishdir. “Zamin” yangiliklarini “Telegram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
“Hizbulloh” bir sutkada Isroilga qarshi 20 ga yaqin harbiy amaliyot o‘tkazdi
Har payshanba jismoniy tarbiya va sport kuni sifatida belgilanadi
Ramzan Qodirov G‘arb davlatlariga hujum qilishga chaqirdi: “Haqiqiy urush qandayligini his qilishsin”
O‘mon sultonligi elchisi: «Urushlarni harbiy kuch bilan hal qilib bo‘lmaydi»
Italiya sudi Quddus Isroil poytaxti emasligi haqida qaror chiqardi
Xalqaro jinoyat sudining orderi Isroilni nega qo‘rqityapti?
Qozog‘iston Ukraina atrofidagi vaziyat tufayli harbiy va fuqarolik obyektlari xavfsizligini kuchaytirdi
2026 yilda bo‘lajak mundialning favoritlari reytingi taqdim etildi
