O‘zbekistonda Ma’muriy javobgarlik to‘g‘risidagi kodeksning yangi tahririni ishlab chiqish jarayoni boshlanmoqda. Prezident farmoyishiga muvofiq, ushbu muhim huquqiy hujjat ustida ish olib borish uchun Idoralararo komissiya hamda Adliya vazirligi huzurida maxsus ishchi guruh tashkil etildi.
Yangi tahrirdagi kodeks loyihasi 2027 yil 1 aprelga qadar manfaatdor vazirlik va idoralar bilan kelishilishi, shuningdek, jamoatchilik muhokamasidan o‘tkazilishi belgilangan. Shundan so‘ng hujjat ko‘rib chiqish uchun Prezident Administratsiyasiga kiritiladi.
Ma’muriy javobgarlik to‘g‘risidagi kodeksni yangilashdan asosiy maqsad — amaldagi qoidalarni zamonaviy hayot talablariga moslashtirishdir. Chunki jamiyat o‘zgarmoqda, munosabatlar murakkablashmoqda, ayrim huquqbuzarliklar esa avvalgi ahamiyatini yo‘qotgan. Shu bilan birga, yangi davrda davlat, jamiyat, yuridik va jismoniy shaxslar manfaatlariga xavf tug‘diradigan yangi holatlar ham paydo bo‘lmoqda.
Shu sababli kodeksni qayta ko‘rib chiqish jarayonida ahamiyati qolmagan huquqbuzarliklar bekor qilinishi, mavjud javobgarlik choralari esa qayta baholanishi kutilmoqda. Qonuniylik, huquq-tartibot, fuqarolar va tashkilotlar manfaatlariga tahdid soladigan harakatlar uchun javobgarlik mexanizmlari takomillashtiriladi. Zarur hollarda yangi huquqbuzarlik tarkiblari ham kiritilishi mumkin.
Adliya vazirligida tuzilgan ishchi guruhga vazirning birinchi o‘rinbosari Mahmud Istamov rahbarlik qiladi. Ushbu guruh tarkibiga yetakchi mutaxassislar, huquqshunos olimlar va soha ekspertlarini jalb qilish imkoniyati ham nazarda tutilgan. Bu esa yangi kodeksni faqat idoralar doirasida emas, balki keng ekspertlik yondashuvi asosida tayyorlashga xizmat qiladi.
Yangi MJtKni ishlab chiqishda ilg‘or xalqaro tajriba, umume’tirof etilgan huquqiy norma va standartlar o‘rganiladi. Bu muhim jihat. Chunki huquqiy tizim qanchalik zamonaviy va adolatli bo‘lsa, fuqarolarning qonunga ishonchi ham shunchalik mustahkam bo‘ladi.
Shuningdek, jarayonda ilmiy doiralar, fuqarolik jamiyati institutlari, ommaviy axborot vositalari vakillari hamda xorijiy ekspertlarni jalb qilish rejalashtirilgan. Ular ishtirokida uchrashuvlar, seminarlar, davra suhbatlari va matbuot anjumanlari o‘tkaziladi. Bu esa kodeks loyihasi ochiqlik va muhokama asosida shakllanishiga zamin yaratadi.
Ma’muriy javobgarlik kodeksi kundalik hayotda fuqarolar eng ko‘p duch keladigan huquqiy hujjatlardan biri hisoblanadi. Yo‘l harakati, jamoat tartibi, tadbirkorlik, ekologiya, sanitariya, davlat xizmatlari va boshqa ko‘plab sohalardagi ma’muriy javobgarlik aynan shu kodeks orqali tartibga solinadi.
Shu bois uning yangilanishi jamiyat uchun katta ahamiyatga ega. Agar kodeks aniq, adolatli va zamonaviy talablarga mos ishlab chiqilsa, u fuqarolar uchun tushunarli, davlat organlari uchun samarali, huquq-tartibot uchun esa mustahkam asos bo‘lib xizmat qiladi. Qisqasi, qonun ham “apdeyt”ga muhtoj — faqat bu safar versiya haqiqatan ham xalqqa qulay bo‘lishi kerak.
“Zamin”ni Telegramʻda oʻqing!
