Bugun, 1 iyundan boshlab, O‘zbekiston qonunchiligida bir qator muhim o‘zgarishlar kuchga kirdi. Elektr energiyasi va tabiiy gaz uchun yangi tariflar amalda qo‘llanila boshladi.
Aholi oyiga 200 kW-soatgacha elektr energiyasi uchun har kW-soatga 650 so‘m to‘laydi. Tabiiy gaz esa isitish mavsumida 500 kub metrgacha, boshqa mavsumlarda 100 kub metrgacha 1 100 so‘mdan hisoblanadi.
Umumbelgilangan soliq tizimiga o‘tish chegarasi 1 milliard so‘mdan qariyb 5 milliard so‘mgacha oshirildi. Bu o‘zgarish tadbirkorlar uchun qo‘shimcha yengillik yaratadi.
Mehmonxona va umumiy ovqatlanish korxonalarida alkogol hamda tamaki mahsulotlarini naqd pulga sotishga yana ruxsat berildi. Alkogol mahsulotlaridagi raqamli markirovka kodlari ham tan olinadi.
Ko‘mir narxlarini davlat tomonidan belgilash amaliyoti bosqichma-bosqich bekor qilinadi. Endilikda narxlar talab va taklif asosida shakllanadi.
Xalqaro sertifikatlarga ega soliq xizmati xodimlari har oy lavozim maoshining 100 foizigacha qo‘shimcha ustama oladi. Bu mablag‘lar Soliq qo‘mitasining maxsus jamg‘armasi hisobidan qoplanadi.
Kafe va restoranlar xodimlarni bir kunlik, uch kunlik yoki bir haftalik qisqa muddatlarga rasmiy ishga qabul qilishi mumkin bo‘ldi. Bu mavsumiy ishlar va mijozlar ko‘paygan kunlarda qonuniy imkoniyat yaratadi.
Ugom daryosi sohillari va suvni muhofaza qilish zonalarida yangi qurilish ishlari taqiqlandi. Daryo havzasi va irmoqlarida gidrotexnik hamda gidroenergetik inshootlar qurishga ham ruxsat berilmaydi.
Qurilish sohasida nazorat kuchaytirildi. Endi qo‘pol qoidabuzarliklar uchun faqat pudratchi emas, texnik va mualliflik nazoratchilari ham javobgar bo‘ladi.
Qiymati 3 milliard so‘mdan yuqori bo‘lgan yirik ijtimoiy obyektlar, ko‘p qavatli uylar, savdo markazlari, sanoat korxonalari va mehmonxonalar qurilishi onlayn kameralar orqali nazorat qilinadi.
Toshkent, Navoiy va Qashqadaryo viloyatlaridagi jazoni ijro etish muassasalarida yosh mahkumlar zamonaviy kasblarga o‘qitiladi. Ular dasturlash, IT va boshqa raqamli yo‘nalishlarni o‘rganadi.
Korrupsiya xavfi yuqori deb topilgan ayrim xodimlar maxsus diagnostikadan o‘tkaziladi. Agar ularda korrupsiyaga moyillik yuqori bo‘lsa, xavfi pastroq lavozimlarga o‘tkaziladi.
Farmatsevtika korxonalari uchun yangi imtiyozlar berildi. GMP sertifikatini olish va xalqaro talablarga moslashish xarajatlarining 50 foizigacha qismi davlat tomonidan qoplanadi.
Suv va salqin ichimliklar uchun raqamli markirovka kodlari hamkor davlatlarda o‘zaro tan olinadi. Bu mahsulotlar harakatini kuzatishni osonlashtiradi va noqonuniy aylanmani kamaytiradi.
Tadbirkorlar uchun bojxona to‘lovlarini 120 kungacha kechiktirib yoki bo‘lib-bo‘lib to‘lash imkoniyati yaratildi. Bojxona auditi esa “maslahatchi-auditor” tamoyili asosida ishlaydi.
“Zamin”ni Telegramʻda oʻqing!
