Xalq deputatlari kengashlarining vakolatlari kengaytiriladi

O‘zbekistonda xalq deputatlari kengashlarining ijtimoiy-iqtisodiy masalalarni hal qilishdagi vakolatlarini yanada kengaytirish rejalashtirilmoqda. Bu 2022–2026 yillarga mo‘ljallangan taraqqiyot strategiyasini 2022 yilda amalga oshirish bo‘yicha “Yo‘l xaritasi”da belgilangan.

Ichimlik va oqova suv, ichki yo‘llar, boshqa infratuzilma ob’ektlarini qurish, bandlik dasturlarini tasdiqlashni tuman va shahar xalq deputatlari kengashlari vakolatiga o‘tkazish mo‘ljallangan.

Shuningdek, hududlarda davlat ta’lim muassasalari, sog‘liqni saqlash ob’ektlarini qurish va ta’mirlashga ajratiladigan mablag‘larni taqsimlash vakolati viloyatlar va Toshkent shahar xalq deputatlari kengashlariga o‘tkaziladi.

Hududlarni kompleks ijtimoiy rivojlantirishga mas’ul bo‘lgan davlat organlari faoliyatini muvofiqlashtirish va tartibga solish tizimini qayta ko‘rib chiqish ham rejalashtirilgan.

Mahalliy kengashlarning nazorat funksiyalarini kengaytirish, ularni tizimlashtirish maqsadida “Xalq deputatlari kengashlari nazorati to‘g‘risida”gi qonun loyihasi ishlab chiqiladi.

Tuman va shahar xalq deputatlari kengashlarida kamida 2-3 nafar deputat doimiy asosda ishlaydigan tartib joriy etiladi.

Mahalliy kengashlar faoliyatining huquqiy asoslarini yanada takomillashtirishga qaratilgan “Xalq deputatlari viloyat, tuman, shahar kengashlari reglamenti to‘g‘risida”gi qonun loyihasi ishlab chiqiladi. “Zamin” yangiliklarini “Vkontakti”da kuzatib boring