Shomurodovga raqobatni boy bergan hujumchi “Real”da Benzema o‘rnini egallaydi

“Real” rahbariyati yoshi o‘tib qolayotgan Karim Benzemaga o‘rinbosar qidirmoqda. Madridliklar o‘zlari ko‘zlagan ikki superto‘purar – Kilian Mbappe va Erling Xolandni qo‘lga kirita olmadi. Endi ularning transfer siyosati keskin o‘zgardi.

Karlo Anchelotti boshchiligidagi murabbiylar shtabi asosiy e’tiborni klub tarbiyasini olgan o‘yinchilarga qaratishga qaror qildi. Xususan, madridliklar endi hujum chizig‘iga qimmatbaho yulduzlarni olmoqchi emas.

So‘nggi ma’lumotlarga qaraganda, “Real” mutasaddilari jamoa yetakchisi va to‘purari Karim Benzemaga munosib o‘rinbosar qidirmoqda. Fransiyalik hujumchining klub bilan shartnomasi bir yildan keyin yakunlanadi.

Karim Fransiya terma jamoasi hujumidagi sherigi Kilian Mbappe kelsa, “Real” bilan hamkorlikni uzaytirishni rejalashtirgan edi. Mbappe o‘ta katta maosh evaziga Parijda qolishga qaror qilganidan keyin 34 yoshli hujumchi ham rejalariga o‘zgartirish kiritadigan bo‘ldi. Benzema bundan o‘tgan yilning avgustida uzoq muddatli shartnoma tuzish bo‘yicha “Qirollik klubi” taklifini rad etib, kelishuvni atigi ikki mavsumga uzaytirgandi.

Benzema bungacha bir necha marta faoliyatining so‘nggi bosqichini o‘zini tarbiyalagan “Lion” jamoasida o‘tkazishini ta’kidlagan edi. Katta ehtimol bilan, Karim kelasi yili yozda erkin agent sifatida qadrdon klubiga qaytib ketadi.

Hozir tarkibda fransiyalik to‘purarning o‘rnini bosadigan hujumchi ko‘zga tashlanmayapti. Klub rahbariyati tarkibdagi hujumchilardan Luka Yovich va Marino Dias bir necha mavsumdan beri o‘zini ko‘rsata olmayotgani uchun ular yaqin kelajakda Karim Benzemaning o‘rnini egallay olmaydi, degan qarorga keldi.

Madridliklar shu yoz ichi har ikki hujumchidan qutulishga harakat qiladi.

Rahbariyat asosiy o‘rinbosar sifatida klub tarbiyalanuvchisi Borxa Mayoralni tanladi. “Qirollik klubi” bu hujumchini 2020 yilda keyinchalik sotib olish huquqi bilan “Roma”ga ikki yillik ijaraga bergandi. Agar ishlar ko‘ngildagidek ketsa, Rim klubi shu yoz ispan hujumchisini transfer qilishi kerak edi.

Lekin o‘tgan yili yozda “Roma”ni Joze Mourino qabul qilib olgach, portugaliyalik mutaxassis hujum chizig‘iga “Jenoa”dan Eldor Shomurodov va “Chelsi”dan Temmi Abraxamni olib keldi. Avvalgi mavsumda “Roma”ning eng zo‘r to‘purari bo‘lgan Borxa Mayoral o‘tgan chempionatning birinchi yarmida asosiy tarkibdagi joyini qaytarib olish uchun kurashdi. Lekin ichki raqobatda Eldor Shomurodovga imkoniyatni boy bergan “Real” tarbiyalanuvchisini Joze Mourino jamoada olib qolishni istamadi.

Shu tariqa, Rim klubi Mayoralni 20 million yevroga sotib olish huquqidan foydalanmaydigan bo‘ldi va yanvardayoq uni “Xetafe”ga ijaraga berib yubordi. Borxa o‘z yurti chempionatida 18 marta maydonga tushib, raqiblar darvozasini olti marta ishg‘ol qildi.

“Real” Borxa Mayoraldan tashqari zaxira varianti sifatida ikkinchi jamoada o‘ynayotgan Xuan Latasani ham ro‘yxatga kiritgan. 21 yoshli futbolchi yoshlar ligasida 30 ta uchrashuvda maydonga tushib, raqiblar darvozasini 13 marotaba ishg‘ol qildi.

Xuan Latasa “Real”ning asosiy jamoasida debyutini ham nishonladi. Ispaniya chempionatining La Ligasi 37-turida “Kadis”ga qarshi o‘tkazilgan o‘yinda Mariano Dias o‘rniga maydonga tushib, to‘qqiz daqiqa o‘ynadi. “Zamin” yangiliklarini “Telegram”da kuzatib boring