Saudiya Arabistoni U-23 bosh murabbiyi: "Kim finalda o‘ynashini vaqt ko‘rsatadi"

Ertaga mamlakatimizda davom etayotgan futbol bo‘yicha U-23 Osiyo kubogining yarim final uchrashuvlariga start beriladi.

Bugun “Bunyodkor” stadionida mazkur bahslar oldidan matbuot anjumani tashkil etildi. Unda Saudiya Arabistoni terma jamoasi bosh murabbiyi Saad al-Shahri va futbolchi Hamad Turki Al-Tuhayfan ishtirok etib, Avstraliya U-23 jamoasiga qarshi kechadigan o‘yin oldidan o‘z fikrlarini bildirib o‘tdi.

Murabbiy: - Avvalambor, yarim finalga chiqqan jamoalarni tabriklayman. Shuningdek, Avstraliya asosiy jamoasini mundialga yo‘l olgani bilan qutlayman. Hamma qatori biz ham finalga chiqishni va g‘olib bo‘lishni istaymiz.

Raqibimiz qanchalik kuchli bo‘lmasin, biz maqsadimiz yo‘lida kurashishdan qaytmaymiz. Chempion bo‘lish bizning asosiy maqsadimiz.

Biz ham, Avstraliya ham o‘rgansa bo‘ladigan jamoamiz. Ya’ni uslub borasida yangiliklar qilmaydigan ikki terma o‘zaro to‘qnash keladi. Raqibimizning kuchli ekanini bilamiz va shunga yarasha tayyorgarlik ko‘ramiz. Inshaalloh, biz finalga chiqamiz.

Ikkinchi yarim finalda kim g‘olib bo‘lishini ayta olmayman. Uchrashuv yakunidan keyin bu aniq bo‘ladi. O‘zbekiston ham, Yaponiya ham ajoyib jamoa. Oldindan bir nima deya olmayman.

Futbolchi: - Murabbiy aytganidek bellashuvga qizg‘in tayyorgarlik ko‘rmoqdamiz. Biz ertaga o‘zimizning eng yaxshi o‘yinimizni ko‘rsatishimiz kerak. Bu biz uchun juda muhim bahs. “Zamin” yangiliklarini “Youtube”da kuzatib boring