Mourino, Shomurodovni o‘ynat! Sen ishongan yulduzlar gol urolmayapti

Yozgi transferlar chog‘ida “Roma”ning barcha chiziqlariga yangi o‘yinchilar olib kelindi. Ayniqsa, Paulo Dibalaning kelgani rosa shov-shuv bo‘ldi. Rimliklar uchun gol urishi kerak bo‘lgan o‘yinchilar – Paulo Dibala, Temmi Abraxam va Nikolo Dzanolo jamoaning asosiy yulduzlari, Mourinoning mustahkam tayanchlari hisoblanadi.

Mana A Seriyaning dastlabki ikki turi o‘tdi hamki, portugaliyalik mutaxassis qadrlagan hujum vakillarining birortasi gollar hisobini ocha olgani yo‘q. Poytaxtlik “bo‘rilar” liga autsayderlaridan “Salernitana” va debyutant klub “Kremoneze” jamoasini kichik hisobda mag‘lub etdi.

Rimliklarning jami olti ochko olishini ta’minlagan gollar himoya vakillari – tayanch yarim himoyachi Brayan Kristante va markaziy himoyachi Kris Smolling hisobiga yozildi.

Mourino yozda “Yuventus” va “Tottenxem”ga bermagan Nikolo Dzanolo so‘nggi ikki yilda uchinchi marotaba og‘ir jarohatlandi. Eng ayanchlisi, italiyalik hujumchi avvalgi ikki jarohatidan qutilganidan keyin psixologik tomondan tushkunlikka tushgan va maydonda “qo‘rqib o‘ynashdan” bazo‘r qutilgandi.

- "Biz juda qattiq qarshilik ko‘rsatadigan jamoaga to‘qnash keldik. Hakamni ham tabriklayman, o‘yinni juda zo‘r boshqardi.

Sen imkoniyatga ega bo‘la turib, gol urolmasang, qo‘rquv demaymanu, lekin muayyan bosim yuzaga keladi. “Kremoneze” so‘nggi 10-15 daqiqa davomida standart vaziyatlarda juda xavfli bo‘ldi, shuning uchun ham uch ochkoni muhim hisoblayman.

Jorjino Veynaldum mashg‘ulotda shikastlangan edi, endi Nikolo Dzanolo yelkasi bilan noqulay yiqildi. Nikolo biz uchun muhim o‘yinchi, endi ma’lum muddat maydonga tusha olmaydi, lekin bu vaziyatda yig‘lash yordam bermaydi. Biz rejalar quramiz biroq murakkab vaziyat yuzaga keladi. Ikkita katta o‘yinchini yo‘qotdik, ularning o‘rnini bosishga variantimiz kam. Futbolda shunday bo‘lib turadi.

Biz himoyachilarning gollari evaziga ikkita uchrashuvda 1:0 hisobida g‘alaba qozondik. Dibala, Abraxam va Dzanolo to‘p kiritadigan davrlar ham kelib qolar", - dedi Joze Mourino.

“Roma” bosh murabbiyi yaqinda Eldor Shomurodov va Feliks Afena–Gyanning o‘yin saviyasi jamoa talabiga javob beradigan darajaga ko‘tarilishini kutishga vaqti yo‘qligini ta’kidlagan edi. Biroq, Mourino suyanayotgan o‘yinchilar ham uzoq muddatga safdan chiqishi va har doim ham to‘purarlik qobiliyatini namoyish qila olmasligi mumkinligini ham hisobga olishga to‘g‘ri keladigan ko‘rinadi.

Janob Mourino, bu ketishda kuningiz yana Eldor Shomurodovga qolishi mumkin. Shuning uchun uni hisobdan erta chiqarib tashlamang. Balki, hujumchilar gollariga pochinni aynan Eldor boshlab berar. Uni bir maydonga tushirib ko‘ringchi!

“Roma” himoya chizig‘i vakillarining gollari evaziga hali ochko yo‘qotmagan uch jamoadan biri bo‘lib turibdi. Lekin raqiblar o‘z oldiga A Seriyada qolishni maqsad qilgan autsayder jamoalar bo‘lganini unutmaslik kerak.

Uchinchi turda “Roma” Turinda “Yuventus” mehmoni bo‘ladi. O‘sha bahs rimliklarning haqiqiy kuchini ko‘rsatishi kutilmoqda. “Zamin” yangiliklarini “Odnoklassniki”da kuzatib boring