"Al-Garafa"ning o‘yinida 3 tadan gol va 3 tadan "qizil"

Qatar Yulduzlar ligasining navbatdagi turida “Al-Garafa” safarda “Al-Ahli Doxa” bilan bellashdi. Ushbu uchrashuvda “Al-Garafa” bosh murabbiyi Andrea Stramachchoni hamyurtimiz Islom To‘xtaxo‘jayevni doimgidek asosiy tarkibda maydonga tushirdi. O‘yin juda asabiy kechdi va shu bilan birga jiddiy kurashlar ostida kechdi.

Bahs 3:3 hisobida yakunlandi va bundan tashqari yana 3 ta qizil kartochka ko‘rsatildi. Buni legionerimiz To‘xtaxo‘jayev boshlab berdi. 36-daqiqada raqib hujumini oxirgi fol chorasi sifatida to‘xtatib qolgani uchun bosh hakam Islomga to‘g‘ridan-to‘g‘ri qizil kartochka ko‘rsatdi. Bu paytga kelib uning jamoasi 0:1 hisobida oldinda edi. Biroq hamyurtimiz maydondan chetlatilishi bilanoq mezbonlar 3 daqiqa ichida 2 ta gol urishdi.

Ikkinchi bo‘lim o‘rtalarida hisob 3:1 ko‘rinishga keldi. “Al-Garafa” esa 85-daqiqada Isxak Belfodilning golidan keyin hisobni qisqartirdi. Qizig‘i, 87 va 89-daqiqalarda endi “Al-Ahli Doxa”dan birin-ketin ikki nafar futbolchiga qo‘polligi uchun qizil kartochka ko‘rsatildi. Oqibatda Yasim Braimi 90+1-daqiqada penaltidan gol urib hisobni tenglashtirdi – 3:3.

O‘yin mana shunday voqealarga boy tarzda o‘tdi va jangovar durang qayd etildi. Islom To‘xtaxo‘jayev esa legioner sifatida ilk bor maydondan chetlatildi. “Zamin”ni Telegramʻda oʻqing!