Eldor Shomurodov ketadi(mi?)...

“Roma” sport direktori Tyagu Pinto hujum chizig‘i bo‘yicha bir necha muhim ishlarni amalga oshirishni rejalashtirmoqda.

Birinchi navbatda, klub rahbariyati universal hujumchi Nikolo Dzanolo bilan yangi bitim tuzish masalasini hal qilish arafasida turibdi. Tyagu Pinto futbolchining agenti Vigorelli bilan o‘zaro hamkorlik bo‘yicha bir qarorga kelishning so‘nggi muddati dekabr oyi bo‘lishini kelishib olgan.

Chunki bu masala hal bo‘lishi bilan, Tyagu Pinto qishki transferlar davri, ya’ni yanvar oyida bir necha o‘zgarishlarni amalga oshirishni mo‘ljallagan.

“Roma” va Nikolo Dzanolo shartnomaning aksariyat bandlari bo‘yicha kelishuvga erishib bo‘lgan. Hamkorlik 2027 yilning yarmigacha uzaytiriladi. Hal qilinishi lozim bo‘lgan masala maoshga tegishli. 23 yoshli futbolchi har mavsum uchun kamida 4 million yevro maosh talab qilmoqda.

Klub mutasaddilari bunga ko‘nmayapti. Sport direktori futbolchining agentidan talabni pasaytirishni so‘rayapti. O‘z o‘rnida, Nikolo Angliya premer-ligasi grandlari va “Yuventus” unga ko‘z tikib turganini, ular rimliklardan ko‘proq maosh berishga qodirligini biladi.

Tyagu Pinto Dzanolo shartnomasi bilan bir paytda “Budyo-Glimt” bilan hamkorligi yakunlanib borayotgan hujumchi Ola Solbakken transferini ham parallel tarzda olib boryapti. Norvegiyalik futbolchining kelishi Dzanologa hech qanday ta’sir o‘tkazmaydi.

Mutaxassislarning ta’kidlashicha, bu transfer Eldor Shomurodovni yana bozorga qaytaradi. Yozda Eldorga qiziqish bildirgan jamoalar ko‘p bo‘ldi. Lekin Joze Mourino o‘zi bir yil muqaddam tanlagan o‘zbek hujumchisini qo‘yib yubormadi.

Shunga yarasha, portugaliyalik mutaxassis Shomurodovga yetarli darajada e’tibor qaratmayapti. Mavsum boshlanganiga uch oy bo‘lsada, Mourino Eldorni A Seriya va Yevropa ligasida to‘rt marotaba maydonga tushirdi. Jismoniy holati a’lo darajada bo‘lgan futbolchi mavsum davomida bor yo‘g‘i 60 daqiqa harakat qildi xolos.

Yaqinda O‘zbekiston milliy terma jamoasi yetakchisi va sardori Eldor Shomurodovning manfaatlarini himoya qilayotgan ProSports Management kompaniyasining Osiyodagi loyihalariga rahbarlik qiluvchi Qahhor Mo‘minov “Sport Ekspress” gazetasiga katta intervyu berib, Joze Mourinoning Eldorga aytgan gaplarini ma’lum qilgandi.

- Mourino Eldorga shunday dedi: “Gapimga quloq tut, “Bolonya”da 10-15 ta uchrashuvda maydonga tushganingdan “Roma”da beshta o‘yinda qatnashganing afzal!”.

Joze Mourino, “Roma”, Italiyadagi hamkorlarimiz bilan maslahatlashib, Rimda qolishga qaror qildik.

Shuni tushunish kerakki, “Roma” jamoasi nomi yonida “top” degan daraja ishlatiladi. Bu har bir futbolchi faoliyati muhim, bu brend.

Eldor eng kuchli beshta ligalardan birida top-klubda o‘ynayapti. Buning qadriga yetish kerak. Shuningdek, Mourino Shomurodovga albatta imkon berilishini ta’kidlayapti, - degan edi Qahhor Mo‘minov.

Bundan tashqari, Qahhor Mo‘minov Shomurodovning kelajagi masalasida ham fikr bildirgan.

- Albatta, biz faqat “Roma” futbolkasini kiyib yurish bilan kifoyalanmaymiz. Qishda bu masalani yana ko‘taramiz. O‘zgarish bo‘lmasa, boshqacha qaror qabul qilamiz. Eldorning yoshi 27 da va u hali Yevropada o‘ynamoqchi, - degan edi Qahhor Mo‘minov.

Bundan ma’lum bo‘ladiki, qishki transferlar vaqtida Eldor Shomurodovning bozoriya yana qaynashi kutilmoqda. Chunki yozda unga xaridor bo‘lgan jamoalardan bir nechtasi o‘zbek hujumchisini olish fikridan voz kechmagani haqida xabarlar bor.

Demak, yangi yilgacha Shomurodov faoliyatida ijobiy tomonga o‘zgarish bo‘lmasa, yanvarda boshqa jamoaga o‘tish masalasi yana ko‘tariladi. “Zamin” yangiliklarini “Odnoklassniki”da kuzatib boring