Shomurodov o‘rniga Ronaldu!

Jahon futboli tarixida eng ko‘p gol urgan Krishtianu Ronaldu qiyin davrlarni boshdan o‘tkazmoqda. Portugaliyalik yulduzning uzoq yillik faoliyati davomida eng yomon mavsumini guvohi bo‘lyapmiz.

Yozda Chempionlar ligasida qatnashadigan jamoa o‘tish ilinjida mavsumoldi yig‘inida qatnashmagan Ronaldu ko‘p narsa yo‘qotmoqda. 37 yoshli hujumchi bir qator kutilmagan muammolarga duch kelmoqda.

Xususan, o‘zi istaganidek Chempionlar ligasi ishtirokchisi safiga qo‘shila olmadi, mavsumoldi mashg‘ulotlarida qatnashmagani uchun sport formasini yo‘qotib qo‘ydi, “Manchester Yunayted”ning asosiy tarkibiga kirolmayapti, klub rahbariyati va murabbiylar shtabi bilan munosabati buzildi, eng asosiysi, birinchi marta zaxira o‘yinchisiga aylanib qoldi.

“Manchester Yunayted” va Krishtianu Ronaldu hamkorligi uzoqqa cho‘zilmaydigan ko‘rinadi. Agar tajribali o‘yinchi yanvarda klubdan ketmasa, yozda erkin agentga aylanadi. Manchesterliklar yaqinda serxarxasha o‘yinchiga yangi bitim bermasligini ma’lum qilgandi.

Ronalduning mashhur agenti Jorje Mendesh o‘z mijoziga munosib klub qidiryapti. Bu mutaxassisning yozdagi urinishlari bekor ketdi. Superto‘purar xizmatlarini bir necha katta klublarga taklif qilgan Mendesh ularning birortasini hamkorlikka ko‘ndira olmadi.

Yevropa matbuotining yozishicha, Krishtianu Ronaldu oldida “Roma” varianti paydo bo‘ldi. Bu haqda taniqli jurnalist Ben Jeykobs ma’lumot berdi.

- Jorje Mendeshga yaqin manbalarim, u kelasi mavsum Ronalduni “Roma”ga joylash bo‘yicha ish olib bormoqda. Rimliklarda Chempionlar ligasiga yo‘llanma olish imkoniyati bor. AQSH chempionati ham o‘rganilmoqda. Biroq, portugaliyalik hujumchining “Chelsi”ga qisqa muddatga o‘tish imkoniyati ham kamroq, - deb yozdi Ben Jeykobs.

Yaqinda “Manchester Yunayted” ustozi Erik ten Xag o‘yindan ketib qolgan Ronalduni asosiy jamoadan chetlatilganidan keyin xorij ommaviy axborot vositalari Joze Mourinoning yulduz futbolchilar bilan ishlash bo‘yicha murabbiylarning xatolarini aytgan gaplarini rosa aylantirishdi.

Hozir “Roma”ni boshqarayotgan portugaliyalik mutaxassis “Agar sen top-o‘yinchilarni boshqara olmasang, umuman biror joyda murabbiylik qilolmaysan. Murabbiy uchun qo‘l ostidagilarni futbol o‘ynashga o‘rgatish kerak emasligini tushinib yetish juda muhim.

Sen Ronalduni jarima zarbasini qanday berishga, Ibrohimovichni ko‘krakda to‘pni qanday to‘xtatishga, Drogbani havoda qanday gol urishga o‘rgata olmaysan. Sening asosiy vazifasing ularni aniq bir jamoada qanday harakat qilish va shunga yarasha o‘ynashni o‘rgatishdan iborat”, - degan edi.

Joze Mourino Krishtianu Ronalduni “Real”ni boshqargan davrda o‘ynata olgan. Agar bu ikki portugaliyalik “Roma”da yana birlashadigan bo‘lsa, Eldor Shomurodov Rim klubidagi o‘rnini butunlay yo‘qotadi.

Poytaxt klubiga Andrea Belotti kelganidan keyin maydonda juda kam ko‘rinayotgan hamyurtimiz ham ayni futbol o‘ynaydigan yoshda zaxirada o‘tirishga ko‘nmasa kerak. Shundoq ham O‘zbekiston milliy terma jamoasi yetakchisi o‘yindan tashqarida juda ko‘p vaqt yo‘qotyapti.

Aksiga olib, Ronaldu Shomurodov bilan bir xil pozitsiyada o‘ynaydi. Har ikkisining asosiy funksiyasi markaziy hujumchi bo‘lsa-da, ko‘proq chap qanotda harakat qiladi. Tanlovning kimning chekiga tushishiga shubha yo‘q.

Hozircha, bularning barchasi Jorje Mendeshning rejasi xolos. Biroq, amalga oshishi mumkin bo‘lgan reja. Shomurodov esa qishki transferlar vaqtida yoki mavsum yakunlanganidan keyin jiddiy qarorga kelishi kerak.

Chunki terma jamoamizning asosiy o‘yinchisi bir oyda bir yoki ikki marta besh-o‘n daqiqaga maydonda ko‘rinish berishi o‘zbekistonlik hech bir mutaxassis yoki muxlisni qoniqtirmaydi. “Zamin” yangiliklarini “Twitter”da kuzatib boring