Boks. Mullajonov, Saidrahimov va Ja’farov yarim finalda, 2 nafar bokschimiz musobaqani tark etdi

^{Foto: Boks federatsiyasi}
Iordaniyaning Amman shahrida bo‘lib o‘tayotgan boks bo‘yicha 2022 yilgi Osiyo chempionatining 7 noyabr kungi bahslari yakunlandi.

Ushbu kunda o‘zbekistonlik olti nafar charm qo‘lqop ustasi chorak final bahslarida qatnashdi.

-75 kg vazn toifasida O‘zbekiston sharafini himoya qilayotgan Saidjamshid Ja’farov Tojikiston vakili Abdumalik Boltayevga imkon qoldirmay, yarim final yo‘llanmasiga ega chiqdi.

Odiljon Aslonov (-80 kg) esa hindistonlik Chahar Lakshiyaga qarshi kechgan jangda qiyin g‘alabaga erishib, keyingi bosqichga chiqdi.

Shohjahon Abdullayev (-86 kg) mezbonlar vakili Adilhindavi Odaiga qarshi jang yutqazib, musobaqadagi ishtirokini yakunladi.

-92 kg vazn toifasi vakili Madiyor Saidrahimov Kamboja nomidan qatnashgan asli o‘zbekistonlik Abdulla Rajabovdan ustun keldi va yarim final yo‘llanmasiga ega chiqdi.

+92 kg vaznda harakat qilayotgan Lazizbek Mullajanov Kuvayt vakili Ali Alqribga imkon qoldirmadi. Mullajonov uchta raundni ham katta ustunlik bilan yakunlab, yarim final yo‘llanmasini naqd qildi.

-50 kg vazn toifasi vakili Aziza Yoqubova vetnamlik Nguyen Ti Tamga yutqazib, musobaqadagi ishtirokini yakunladi. “Zamin”ni Telegramʻda oʻqing!