Eldor Shomurodov Temmi Abraxamga ta’sir o‘tkaza boshladi

A Seriyaning 14-turidan keyin “Roma” ketma-ket ikki yildan beri o‘zi ko‘tarila olmayotgan oltinchi o‘ringa tushib qoldi. Joze Mourino shogirdlari safar uchrashuvidan ochko yo‘qotib qaytdi. Bu gal “Sassuolo” mehmoni bo‘lgan rimliklar o‘yin yakunlanishiga bir necha daqiqa qolganida tayyor g‘alabani qo‘ldan chiqardi.

Biz uchun ahamiyatlisi, Eldor Shomurodov mavsum boshidan beri ilk martda uchrashuvni boshlang‘ich tarkibda boshlagani bo‘ldi. Legionerimiz bosh murabbiyning ishonchini qayta qozona boshlagani Temmi Abraxamga ijobiy ta’sir qildi. Ya’ni, angliyalik hujumchi hamyurtimiz tomonidan raqobatni seza boshladi. Buni mutaxassislar ta’kidlamoqda.

Shomurodov o‘rniga maydonga tushgan Temmi Abraxam uch oylik quruq seriyasiga barham berib, “Sassuolo” darvozasini ishg‘ol qildi. Biroq, Rik Karsdorpning xatosi jamoani uch ochkodan ayirdi.

Italiya futbolini yoritib borayotgan https://www.calciomercato.com sayti mutaxassislari o‘yinda ishtirok etgan futbolchilar harakatini quyidagicha baholadi:

Ruy Patrisio 6.5:
Frattezining xavfli zarbasini mahorat bilan qaytardi. Gol kiritilgan vaziyatda Pinamontining zarbasi oldida ojiz qoldi. O‘yinni ancha yaxshi o‘tkazdi.

Manchini 5.5:
Lauriyente bilan ancha kurashdi. Abraxamga zo‘r pas oshirdi. Faol o‘ynadi.

Smolling 5.5:
Tajribali himoyachining bo‘shashib qolgani ko‘rindi. Raqib hujumchilari o‘tib ketishiga yetarli darajada qarshilik ko‘rsata olmadi.

Ibanes 6:
O‘zining odatiga mos xotirjam o‘ynadi.

Chelik 6:
Birinchi bo‘lim oxirlarida Zalevskiga juda qulay pas oshirdi. Ba’zan raqobatni boy berganini ham ko‘rdik.

Matich 6:
Lopes va Frettizining hujumlarini to‘xtatib qolishga erishdi. Pas orqali o‘ynashga harakat qildi. Biroq, hamma uzatmasi ham manzilga aniq yetib bormadi.

Kristante 6.5:
Jamoasi uchun juda foydali o‘yin namoyish qildi. Ham hujumchilarga, ham himoyadagi jamoadoshlariga katta yordam berdi.

Zalevskiy 6:
Himoyalanish vaqtida foydasi deyarli tegmadi, lekin hujum tashkil qilishda Chelikdan ancha samaraliroq o‘ynadi. Bir vaziyatda gol ura olmagani, jamoasining zarariga ishladi.

Dzanolo 5.5:
O‘yin davomida bir marta Shomurodovni yaxshi pozitsiyaga chiqardi. Lekin harakatlarida faollik va barqarorlik yetishmadi. Darvozaga aniq va kuchli zarba bera olmadi.

Volpato 6.5:
Raqib futbolchisi Lopesni ancha qiynab qo‘ydi. Ancha faol harakat qildi, o‘ynash ishtiyoqi baland edi.

Shomurodov 5,5:
O‘yin davomida bir necha bor tezligini namoyish qildi. Darvozaga zarba berishga urindi. Bir vaziyatda to‘pni qulay pozitsiyada turgan Dzanolodan qizg‘ondi. Eldor o‘zi zarba berdi va u yo‘llagan to‘pni “Sassuolo” darvozaboni qaytarishga ulgurdi.


Abraxam 7:
Eldor Shomurodov o‘rniga tushgan futbolchi jamoasi uchun juda muhim gol urdi.

Mourino 6:
Shomurodovni ilk daqiqalardan o‘ynatish rejasi ish berdi. Bosh murabbiy qarori Shomurodovga ham, Abraxamga ham yaxshi ta’sir qildi. Shogirdlari g‘alabani ushlab qola olmagani oqibatida jamoa yana ochko yo‘qotdi. “Zamin” yangiliklarini “Odnoklassniki”da kuzatib boring