Futbolchimiz kerak bo‘lsa, Shomurodovga almashamiz!

Qatarda jahon chempionati davom etayotgan pallada Yevropa ligalaridagi jamoalar qishki transferlar oynasiga tayyorgarlik ko‘rmoqda.
O‘zbekistonlik futbol muxlislari e’tiborida turgan “Roma”da ham jiddiy o‘zgarishlar bo‘lishi kutilmoqda.

Joze Mourino tarkibni o‘zi istagan holatga keltirish uchun sport direktori Tyagu Pinto bilan hamkorlikda ish olib bormoqda. Portugaliyalik mutaxassislar olinadigan futbolchilar ro‘yxatiga “Torino” yetakchisi va sardori Sasha Lukichni qishki transferlar davrida asosiy nishon qilib belgiladi.

Calciomercato.com nashrining xabariga ko‘ra, rimliklar ayni paytda Serbiya terma jamoasi safida jahon chempionatida ishtirok etayotgan yarim himoyachini olish uchun turinliklar bilan kelishishga urinmoqda.

“Torino” sport direktori Davide Vagnati 26 yoshli futbolchini 15 million yevroga baholamoqda.

Italiya matbuotining yozishicha, rimliklar o‘zi ko‘zlagan futbolchiga yetishish uchun kelishuvga hujumchi Eldor Shomurodov yoki himoyachi Marash Kumbullani qo‘shishni rejalashtirmoqda.

Hozirdan aytish mumkinki, albaniyalik himoyachi Rimdan Turinga ko‘chib o‘tishga rozi bo‘lmaydi. 22 yoshli futbolchi kelajagini “Roma”ga bog‘lagan.

- Marash Kumbulla transfer haqidagi xabarlarga e’tibor qaratmayapti. Unga “Roma” yanvarda yana bir markaziy himoyachi sotib olishi haqidagi ma’lumotlar ham ta’sir qilgani yo‘q. “Bo‘rilar” himoya chizig‘idagi raqobat kuchayib borayotganiga qaramay, albaniyalik futbolchi bosh murabbiy Joze Mourino ishonchini qozoniga bel bog‘lagan, - deb yozdi Corriere dello Sport gazetasi.

Joriy mavsumda to‘rt marta maydonga tushib, atigi 49 daqiqa o‘ynagan Marash Kumbulla shartnomasi yakunlanadigan sana – 2025 yilning yarmigacha poytaxt klubida to‘p tepishni reja qilgan.

Transfer bo‘yicha mutaxassislar “Torino”ga Eldor Shomurodov nomzodi ma’qul kelayotganini ta’kidlayapti. Aslida bu klub anchadan beri asosiy hujumchisi vazifasini bajara oladigan o‘yinchi sifatida o‘zbek legionerini ko‘zlab yuribdi. Turinliklar yozda ham Shomurodovga og‘iz solgandi.

“Torino” safida hozir uch nafar hujumchi bor va bu A Seriyada eng kam ko‘rsatkich. Ana shu hujumchilardan faqat ikkitasi umumiy hisobda raqiblar darvozasiga uchta to‘p kiritgan. Bir so‘z bilan aytganda, “Torino” yozda jamoani tark etib, “Roma” safiga qo‘shilgan Andrea Belotti o‘rnini bosadigan o‘yinchiga muhtoj.

Eldor Shomurodovning o‘zi ham “Roma” rahbariyati, xususan, Joze Mourinoga agar unga muntazam imkon berilsa, samarali o‘ynay olishini isbotlash uchun ma’lum muddat ijaraga to‘p tepishga qarshi emasligi haqida xabarlar tarqatilgan edi.

Qolaversa, kuni kecha “Roma” bosh murabbiyga juda yoqadigan hujumchi Ola Solbakkenni o‘z tarkibiga qo‘shib olganini rasman e’lon qildi. Endi Mourino tanlovi to‘g‘ri ekanini isbotlash uchun asosiy e’tiborni norvegiyalik hujumchiga qaratadi va undan asosiy forvardlardan biri sifatida foydalanadi.

Bu vaziyat shundoq ham mavsum boshidan beri hammasi bo‘lib ikki soatdan ko‘proq o‘ynagan Shomurodovning ahvolini yanada og‘irlashtiradi.

Eldor Shomurodov O‘zbekiston milliy terma jamoasi safidagi o‘yinlarda yuqori sport formasida ekanini namoyish qilib kelyapti. Xususan, 2022 yil davomida mamlakatimiz bosh jamoasidagi o‘nta uchrashuvda raqiblar darvozasini 11 marotaba ishg‘ol qildi.

Shunga qaramay, Joze Mourino legionerimizni deyarli o‘ynatayotgani yo‘q. Eldor yangi mavsum hisobidan barcha turnirlarda sakkiz marta maydonga tushib, jami 151 daqiqa o‘ynadi va bitta gol urdi. “Zamin” yangiliklarini “Twitter”da kuzatib boring