Afsonaviy futbolchi Pele vafot etdi

^{Foto: Sky Sports}
Afsonaviy futbolchi Pele (Edson Arantis de Nasimentu) 82 yoshida vafot etdi.

Braziliyalik futbolchi 2021 yil sentyabr oyida saraton tufayli jarrohlik amaliyotini boshidan o‘tkazgan edi. 2022 yil boshida Pele kimyoterapiya amaliyotini o‘tagan. So‘nggi vaqtlarda unga kimyoterapiya ham yordam bermayotgani, uning ahvoli yomonlashayotgani xabar qilingandi.

Pele — Jahon Chempionatida uch marta g‘olib bo‘lgan tarixdagi yagona futbolchi (1958, 1962 va 1970 yillar).

JCH larida umumiy hisobda 14 ta o‘yinda ishtirok etib, 12 ta gol urgan va ularning 3 tasi finallarga to‘g‘ri keladi.

Pele Braziliya terma jamoasida 92 o‘yinda 77 ta golga mualliflik qilgan (1957 yildan 1971 yilga qadar). Uning rekordi deyarli 50 yil saqlanib turdi va yaqinda Neymar tomonidan takrorlandi.

Klub miqyosida sobiq futbolchi «Santos» sharafini himoya qilgan. Jamoa bilan birga Libertadores Kubogi va Qit’alararo Kubok sohibiga aylangan (1962 va 1963 yillar). Shuningdek, «Nyu-York Kosmos» jamoasida ham to‘p surgan.

Pele FIFA komissiyasi, World Soccer va France Football tomonidan XX asrning eng yaxshi futbolchisi deb tan olingan. “Zamin” yangiliklarini “Facebook”da kuzatib boring