Eldor Shomurodov “Roma”da yetarli o‘yin amaliyotiga ega bo‘lmayotgani uchun Rimdan ketishga qaror qilgan edi. Uzoq muddatli muzokaralardan keyin legionerimiz yanvar oyi oxirida A Seriya autsayderlaridan biri “Spetsiya”ga ijara asosida ko‘chib o‘tdi.
O‘zbek hujumchisini o‘z jamoasiga taklif qilgan avvalgi bosh murabbiy Luka Gotti hamyurtimizni ketma-ket ikki uchrashuvda ilk daqiqalardan o‘ynatdi. Unga asosiy tarkib hujumchisi sifatida munosabatda bo‘ldi.
Biroq, klub rahbariyati qoniqarsiz natijalar tufayli Luka Gottini iste’foga chiqarib, o‘rniga Leonerdo Semplichini olib keldi.
Yangi bosh murabbiyning tanlovi boshqacha bo‘lib chiqdi. Bu mutaxassis mana ketma-ket ikkita bahsdan beri Shomurodovni zaxirada olib qolmoqda va o‘yin oxirida bir necha daqiqaga maydonga tushiryapti.
“Spetsiya” O‘zbekiston milliy terma jamoasi hujumchisini yarim mavsum o‘ynatish uchun “Roma”ga 1,5 million yevro ijara haqi to‘lagan. Shu bois, ko‘pchilik mutaxassislar va liguriyalik muxlislarni Semplichi qachon Shomurodovga ko‘proq imkoniyat berishi qiziqtirmoqda.
“Spetsiya”ning “Verona”ga qarshi o‘tkazgan uchrashuvidan keyingi matbuot anjumanida Leonardo Semplichi Eldor Shomurodov borasida ham fikrlarini bildirib o‘tdi.
Ta’kidlash joizki, bu bahsda Eldor 75-daqiqada maydonga tushib, ancha faol o‘ynadi. Hamyurtimiz jamoasining hujumlarini kuchaytira oldi. Jamoadoshini gol urish uchun qulay pozitsiyaga chiqardi.
Leonardo Semplichi Eldorning harakatlariga ham munosabat bildirdi.
- Eldor Shomurodov va Viktor Kovalenko maydonga tushganidan keyin o‘yinga yaxshi kirishib ketdi. Bu futolchilar har doim bahsga kirishishga tayyor va aynan mana shu xususiyat bizning kuchli tomonimiz hisoblanadi.
Men oldimizdagi maqsadlarga yetishish uchun bir bo‘lib harakat qila oladigan kuchli jamoa shakllantirishni mo‘ljallaganman. Bir necha futbolchilar ilk daqiqalardan o‘ynash salohiyatiga ega. Xususan, Eldor Shomurodovdan ham boshlang‘ich tarkibda foydalanishim mumkin. Buning uchun hujum chizig‘idagi balansni topishimiz, Shomurodov bu tanlov to‘g‘riligini isbotlashi shart.
Bizda gol urayotgan futbolchilar ko‘p emas. Uzoqdan zarba berishga ham tayyorgarlik ko‘ryapmiz. O‘yinchilarda o‘ziga bo‘lgan ishonchni kuchaytirishimiz talab etiladi. Ayniqsa, uchrashuvlarning final qismini samarali o‘tkazish ko‘p narsani hal qiladi.
Asosiy to‘purarimiz Mbala Nzola hujumda sherik bilan o‘ynay oladi. Bu futbolchi ham Eldor Shomurodov kabi biz uchun juda qadrli, - dedi Leonardo Semplichi.
“Spetsiya” 25-turdan keyin ochkolari sonini 21taga yetkazib oldi va jamoa musobaqa jadvalida 17-pog‘onada bormoqda. Liguriyaliklarning eng yaqin ta’qibchisi “Verona” uch ochko ortda qolmoqda.
Eldor Shomurodov jamoasi keyingi uchrashuvni ham o‘z muxlislari ko‘z o‘ngida o‘tkazadi. “Spetsiya” 10 mart kuni “Inter” bilan bellashadi.
“Zamin” yangiliklarini “Vkontakti”da kuzatib boring
