Avstraliya U-20 termasi bosh murabbiyi: "Jahon chempionatida Osiyo sharafini himoya qilmoqchi edik, ammo endi bu imkonsiz"
U-20 Osiyo kubogining chorak final bosqichidan o‘rin olgan O‘zbekiston U-20 – Avstraliya U-20 o‘yinidan (1:1, pen. seriyasi 5:4) so‘ng Avstraliya termasi bosh murabbiyi Trevor Morgan matbuot anjumanida qatnashdi.
O‘yin haqida
- Birinchi navbatda, O‘zbekistonni tabriklayman. Bugungi o‘yinimizdan hafsalam pir bo‘ldi. Natija biz kutgandek bo‘lmadi va Jahon chempionatidan quruq qoldik.
- 33 mingdan ortiq muxlislar o‘yiningizga qanchalik ta’sir ko‘rsatdi deb o‘ylaysiz?
- Aniqki, buning ta’siri bo‘ldi, ammo bu futbol. Buncha muxlis qarshisida o‘ynash biz uchun ham katta tajriba bo‘ldi.
- Natija Avstraliya uchun qoniqarsiz. Umuman olganda esa bu musobaqadan foydali nima oldingiz?
- Biz bu musobaqada ajoyib xarakter ko‘rsatdik. Aynan shu jihatdan jamoamiz ancha o‘sdi. Biz Osiyo sharafini Jahon chempionatida himoya qilmoqchi edik, ammo endi bu imkonsiz.
- Musobaqaning tashkiliy masalalari haqida fikringiz qanday? Umuman olganda siz Toshkentda birinchi marta emassiz...
- Umuman olganda yaxshi. Lekin mashg‘ulot maydonlari bilan muammolar bor edi.
- Qo‘shimcha bo‘limlarning ikkinchisida deyarli hujum qila olmadingiz. Bu charchoq bilan bog‘liqmidi?
- Hujum qilmadik? Bu sizning fikringiz. Men bunday deb o‘ylamayman.
- Segichich oxirgi penalti zarbasida to‘sinni nishonga olganda qanday hislar o‘tdi. Agar o‘sha vaziyat gol bo‘lganda, barchasi boshqacha bo‘lishi mumkin edi...
- Biz bu musobaqada ajoyib harakat qildik. Bu futbol. Siz barcha narsani to‘g‘ri qilishingiz mumkin, ammo birgina jihat yetishmasa ham bu natijaga ta’sir o‘tkazadi. Segichichga kelsak, u ajoyib futbolchi. Bu musobaqada jamoadoshlarini ruhlantirdi, ajoyib xarakter ko‘rsatdi va ko‘p joyda jamoamizga yordam berdi. Xato esa hammada bo‘ladi.
“Zamin” yangiliklarini “Youtube”da kuzatib boring
