“Roma” bosh murabbiyi Joze Mourino mavsum yakunlanishi bilan Italiyani tark etishi mumkinligi aytilmoqda. Ispaniyalik jurnalist Oyer Fano Dadebatning ma’lum qilishicha, portugaliyalik murabbiy “Real”ga ko‘chib o‘tadi.
- “Real”ning keyin bosh murabbiyi Joze Mourino bo‘ladi. Bu haqda yana rasmiy xabar o‘qiysiz. Iyulda bu yangilik rasman tasdiqlanganda bayram qilishingiz mumkin, - deb yozdi Oyer Fano Dadebat.
Mourino “Roma”ni 2021 yilning yozidan beri boshqarmoqda. Kuchli beshlik chempionatlaridagi yagona futbolchimiz Eldor Shomurodovni “Roma”ga taklif etgan ham aynan Mourino hisoblanadi.
Joze Mourino qo‘l ostida “Roma” futbolchilari UEFAning yangi musobaqasi – Konferentsiyalar ligasining ilk g‘olibi sifatida tarixda qoldi. Ayni paytda rimliklar A Seriyada kuchli to‘rtlikdan joy egallab, kelasi mavsum Evropa Chempionlar ligasida to‘p tepish huquqi va Evropa ligasida bosh sovrinni qo‘lga kiritish uchun kurashni davom ettirmoqda.
Darhaqiqat, Joze Mourino Eldor Shomurodov etarli darajada o‘yin amaliyotiga ega bo‘lishi uchun uni yozgacha “Spetsiya” klubiga ijaraga jo‘natdi. Endi Shomurodov Rimga qaytguncha portugaliyalik murabbiyning o‘zi ketib qolishi mumkin.
Mourino 2010-2013 yillar davomida “Real” futbolchilariga ustozlik qilgan. Tajribali murabbiy qo‘l ostida madridliklar Ispaniya chempionati g‘olibi bo‘lgan.
Hozirgi bosh murabbiy Karlo Anchelottining klub rahbariyati bilan munosabati buzilgan. Italiyalik maestro o‘tgan mavsumda jamoani Ispaniya chempionati va Evropa Chempionlar ligasi g‘olibiga aylantirganiga qaramay, klub xo‘jayinlari undan qutilmoqchi.
Rahbariyat tajribali murabbiyni murakkab uchrashuvlarda taktik echimlar topa olmayotganlikda ayblamoqda.
Karlo Anchelotti chempionatdagi muvaffaqiyatsizliklarni yozda klub xo‘jayinlari transferlarni amalga oshirishga imkon bermaganligi bilan izohlayapti.
Garchi Anchelotti shartnomasining so‘nggi kuni – 2024 yilning 30 iyunigacha “Qirollik klubi”da qolishini ta’kidlayotgan bo‘lsa-da, mutasaddilar uning o‘rniga yangi bosh murabbiy olib kelish bo‘yicha ish boshlanganini yashirayotgani yo‘q.
“Zamin” yangiliklarini “Youtube”da kuzatib boring
