Fargʻonada boʻlib oʻtgan voqea bir necha soat davomida futbol olamida keng muhokamalarga sabab boʻlganidan xabaringiz bor. Shu bois, “Soʻgʻdiyona” futbolchisi bilan aloqaga chiqdik. Uning aytishicha, voqea aslida umuman boshqacha koʻrinish olgan.
Sen uchun muqaddas boʻlgan suvni olib qoʻyishganidan gʻazablanganing haqida aytyapsan. Seni bu qadar asabiylashishingga sabab boʻlgan bu suv nima edi oʻzi?
- Bu men cherkovdan olib kelgan muqaddas suv. Men uchun uning ahamiyati juda katta. Asabiylashganimni sababi bu suvni ular qaerga berkitganini uzoq vaqt davomida soʻradim. Ular esa, xuddi hech narsani bilmaydigandek oʻzini tutdi. Ularga bu suvni oʻgʻirlab olish huquqini hech kim bermagan.
Sen professional futbolchisan. Bunday keskin holatlar birinchi marta karerangda sodir boʻlgani yoʻq. Agressiv yondashganing qanchalik toʻgʻri boʻldi deb hisoblaysan?
- Xa, professional futbolchiman. Doim maydonda oʻzimni shunday tutganman, ammo bu holatda oʻzimni aybdor deb hisoblamayman. Hozir, barcha meni aybdor ekanligimni tinmay takrorlamoqda. Hech kim vaziyatni yaxshilab oʻrganish yoki uni mohiyatini anglashga urinmayapti. Bolalarni birovni narsasini oʻgʻirlashga undaydigan “odamlar” aslida aybdor.
Bu hodisa futbol olamida negativ emotsiyalarga sabab boʻldi. Nima deb oʻylaysan, 10 yoshli bolalarga nisbatan qilingan agressiv munosabat qanchalar toʻgʻri?
- Men ularni urushganim yoʻq. Xahorat qilmadim. Shunchaki, suvimni topib berishlarini soʻradim. Oʻsha epizodda meni jahlimni chiqargan yagona inson darvoza ortida turgan “erkak” edi. Aniq bilaman, aynan u bolalarni suvimni oʻgʻirlashga undagan.
Ana shu bolalardan biri seni farzanding boʻlganida, bu vaziyatga ota sifatida reaktsiyang qanday boʻlgan boʻlar edi?
- Birinchi navbatda men bolalarimni oʻgʻirlik qilmaslikka oʻrgataman. Agar bunday qilsa, albatta qilmishi uchun jazolayman. U birovni narsasini ruhsatsiz olishi mumkin emas!
Milan oʻzbek futboli ishqibozlari seni doim hurmat qilgan. Bu mehr va e'tiborni yoʻqotib qoʻyishdan qoʻrqmaysanmi?
- Asl haqiqatni bilgan insonlar men haq ekanligimni biladi. Men hech qachon ishqibozlarga nisabatan keskin fikr bildirmaganman. Vaholanki, ularning aksariyati meni haqorat qiladi va doimo bosim oʻtkazishga urinadi. Men professional futbolchiman. Haqiqat bir kun yuzaga chiqishiga ishonaman.
Hozirgi holatdan kelib chiqib, muxlislarga nima degan boʻlar eding?
- Koʻrib turganingizdek, bu mening aybim emas. Men uchun muqaddas suv tom ma'noda muqaddas. Bu suvni mendan oʻgʻirlab olish ilinjida bolalardan foydalanganlar abadiy futboldan chetlatilishi lozim.
Mayli, boʻlar ish boʻldi. Balki, oʻsha epizod uchun bolakaylar bilan suhbatlashish, oʻrni boʻlsa uzr soʻrash kerakdir?! Bu fikrimga munosabatingiz qanday?
- Men bolalar bilan qoʻpol munosabatda boʻlganim yoʻq. Shunchaki, ulardan suvimni berishlarini talab qildim. Men hech kimni oldida uzr soʻramoqchi emasman. Bolalarni birovni narsasini oʻgʻirlashga undagan shaxs kechirim soʻrasin. Mendan emas, haqiqatni bilmay turib menga tahdid qilayotgan boshqa insonlar oldida aybini tan olsin.
Yahyoxoʻja Ulugʻxoʻjaev suhbatlashdi.
“Zamin” yangiliklarini “Telegram”da kuzatib boring
