Futbolchilik davrida “Manchester Yunayted” jamoasi safida ikki marta Angliya chempionligi, “Reynjers” tarkibida ham ikki marotaba Shotlandiya chempionati g‘olibligini qo‘lga kiritgan rossiyalik Andrey Kanchelskis ayni paytda tajribali mutaxassis sifatida futbolga oid vaziyatlarni tahlil qilib kelmoqda.
Bosh murabbiy sifatida ikki marta “Navbahor”ni boshlagan Andrey Kanchelskis o‘zbek futbolini yaqindan biladi. Shu bois, Rossiya futbolidagi mutaxassislar, murabbiylar, jurnalistlar o‘zbekistonliklar haqida gap ketganida aynan unga ko‘p murojaat qilishadi.
Kanchelskis metaratings.ru saytiga bergan intervyusida Rossiya Premer-ligasining birinchi davrasida eng yaxshi o‘yin ko‘rsatgan ikki futbolchi nomini tilga oldi. Ulardan biri – Abbosbek Fayzullayev.
- Rossiya Premer-ligasining birinchi davrasida kim meni hayratga soldi? “Dinamo”dagi Konstantin Tyukavin yaxshi o‘ynadi. Abbosbek Fayzullayev keldi va SSKAda yaxshi o‘yin namoyish qilmoqda. Iakror bo‘la ham aytaman, men uni “Lokomotiv”ga tavsiya qilgandim. Eplay olishmadi, bu ularning muammosi.
Shunlay qilib, faqat mana shu ikki o‘yinchini ajratib ko‘rsata olaman. Eng muhimi, ular chempionatning ikkinchi yarmida ham, kelasi mavsum ham shunday faol o‘yin ko‘rsatishi kerak.
Abbosbek Fayzullayev alohida tilga olish shart. U yaxshi darajadagi o‘yinchi. Barqaror o‘ynayapti va mahorat ko‘rsatyapti.
Agar Fayzullayevni qishda transfer qilmoqchi bo‘lganlar chiqsa, SSKA uni qanchaga sotib yuborishi kerakligini bilmayman. “Armiyachilar” uni imkon qadar qimmatroq – 10 million yevrodan baland narxga transfer qilib, pul ishlab olishi tarafdoriman.
Abbos bu summaga loyiqmi? Hozir jahon futbolida bu muhim emas. O‘yinchilarga 100 millionlab sarflanyapti. Shundan kelib chiqib, Fayzullayev uchun 3-5 million yevrodan ortig‘i yaxshi narx hisoblanadi.
Bu orqali SSKA pul ishlab oladi, Fayzullayev esa, yangi bosqich va yanada yuqori darajaga ko‘tariladi, – dedi Andrey Kanchelskis.
“Paxtakor” tabiyalanuvchisi bo‘lgan Abbosbek Fayzullayev avgust oyining boshida SSKAga transfer qilingan edi. Toshkent klubi bu transfer uchun 500 ming yevro badal puli oldi.
20 yoshli hujumkor futbolchi qisqa vaqt ichida o‘z salohiyatini namoyish qila oldi. Rossiya Premer-ligasi va mamlakat kubogida jami o‘n to‘rt marotaba maydonga tushib, raqiblar darvozasini bir marta ishg‘ol qildi hamda jamoadoshlariga oltita golli pas uzatdi.
Fayzullayev samarali o‘yini tufayli SSKAning sentyabr va oktyabr oylaridagi eng yaxshi futbolchisi, deb e’tirof etildi. Yana uchta uchrashuvda eng yaxshi o‘yinchi bo‘ldi.
Rossiya futbolining aksariyati vakillari o‘zbek legionerini chempionatning birinchi davrasida asosiy kashfiyot bo‘lganini ta’kidlamoqda.
“Zamin” yangiliklarini “Facebook”da kuzatib boring
