III «Zakovat-Gambit» shaxmat turniriga bag‘ishlangan brifingda klassik shaxmat bo‘yicha jahon chempioni, grossmeyster Vladimir Kramnik o‘zbek shaxmatchilari bilan birinchi marta 1992 yilgi shaxmat olimpiadasida uchrashganini esladi.
«O‘sha musobaqada Rossiya birinchi o‘rinni, O‘zbekiston ikkinchi o‘rinni egallagan edi. Bu hamma uchun kutilmagan holat bo‘lgandi. U yerda barcha kuchli jamoalar o‘ynashiga qaramasdan yaxshi natija ko‘rsatgan. Bu hamma uchun kutilmagan sovg‘a bo‘lgan. O‘zbekiston ajoyib shaxmat an’analariga ega davlat.
Menimcha, hozirgi avlod barcha davrlardagidan kuchli hisoblandi. Oxirgi shaxmat olimpiyasidagi muvaffaqiyatingiz tahsinga sazovor. Bu faqatgina shaxmat uchun emas, butun mamlakat uchun katta voqelik. Men o‘zbek shaxmati uchun, yigitlar uchun xursandman. Bu yana ham rivojlanish uchun muhim qadam. Yosh shaxmatchilarga bunday tajribalar kerak, mening o‘zim Anatoliy Karpov jahon chempioni bo‘lganidan ilhomlanib shaxmatga kirib kelganman», — dedi Vladimir Kramnik.
Jahon chempioni hozirgi avlod o‘zbek shaxmatchilari ancha yoshligi va hali bor salohiyatini ko‘rsatmaganini ta’kidlagan.
«Ishonchim komilki, shaxmatchilaringiz kuchli 10 talikda bo‘ladi. Hech bo‘lmasa, bir nafari jahon chempioni bo‘lishidan umidvorman.
Bu musobaqada ham 2-3 nafar yosh iqtidorlarni o‘zim uchun kashf qildim. Ishonchim komil, ulardan ham shaxmatchilar chiqadi.
O‘zbekistonga birinchi marta tashrif buyurishim. Yurtingizda yosh shaxmatchilar uchun juda yaxshi imkoniyatlar yaratib berilganiga guvoh bo‘ldim. Menda ajoyib taassurotlar qoldirdi», — dedi grossmeyster.
Uning qo‘shimcha qilishicha, o‘zbek shaxmati dunyo miqyosida kuchli 5 talikdan joy oladi.
