Abbosbek Fayzullayevga “top-5” ligalariga bormaslik tavsiya qilindi

Abbosbek Fayzullayevga “Monako” va “Real Sosedad” kabi klublardan jiddiy qiziqish bo‘layotgani ortidan SSKA o‘z legioneriga yangi shartnoma berishga qaror qildi. Aksariyat futbol mutaxassislari 21 yoshli hujumkor futbolchi Yevropaning kuchli ligalariga bo‘layotgan chorlovlarga o‘ylanib o‘tirmay, transferga rozi bo‘lish kerakligini ta’kidlamoqda.

Biroq SSKA va Rossiya terma jamoasi sobiq futbolchisi Dmitriy Xamuxa bu fikrlarga qo‘shilgani yo‘q. U Abbosbek Fayzullayev kuchli beshlik ligalariga o‘tmagani ma’qul, deb hisoblamoqda.

- SSKAning qaysi chizig‘i eng nozik?
- Sovrindorlar qatoriga kirish yo‘lida kurashish uchun “armiyachilar”ga ko‘p gol ura oladigan, vaziyatlardan foydalanish samaradorligi yuqori bo‘lgan markaziy hujumchi kerak.

- Tamerlan Musayev mavsumning birinchi qismida 7 ta gol urdiku. Bu kammi?
- Musayev o‘zida borini maksimal darajaga chiqib chiqaryapti. Lekin oldinga qo‘yilgan maqsadlarni inobatga olish kerak...

- Bu vazifalar uchun to‘g‘ri kelmaydimi?
- Har qanday holatda ham Musayev rotatsiya futbolchisi bo‘lib qolaveradi.

- Fyodor Chalov yuqori darajaga chiqqan davrida undan kuchli bo‘lganmi?
- Ha shunday bo‘lgan. Chalovning samaradorligi va ko‘rsatkichlari Musayevnikidan ancha yuqori edi. Qolgan “armiyachilar”ni gapirmasa ham bo‘ladi.

- Guarirapa va Koytani olib, SSKA adashdimi?
- Nima deyish mumkin?... Koyta avval boshdan tavakkal transfer edi.

- Nega?
- Bu futbolchi uzoq vaqt jarohatda bo‘lgan, o‘yin amaliyoti yo‘q edi. SSKA uni olib, xatoga yo‘l qo‘yishi ehtimoli katta bo‘lgan. Uning transferi bo‘yicha nega mana shu qaror qabul qilinganini hali ham tushunmayman.

- Pyanich haqida nima deysiz? Bahorda SSKAga yordam bera oladimi?
- Pyanich jamoaning yetakchisi o‘yinchilaridan biriga aylana oladi, deb o‘ylamayman. Chunki ligamiz juda murakkab. Kurash ko‘p, harakat ko‘p, Miralem bu borada eng zo‘ri emas.

- Tezligi pastmi?
- Ha. Bundan tashqari, maydonda har doim ortga chekinib, himoyachilarga yaqin o‘ynayapti. U chiziqlar orasida o‘ziga joy topishi, hujumlarni tashkil etish bilan shug‘ullanishi kerak. Ammo Miralem o‘z o‘yin uslubi bilan hujumlarni ushlab qolyapti.

- Abbosbek Fayzullayevdan ko‘proq narsa kutganmidingiz?
- U juda katta yuklama ostida qolib ketdi. Yozda Olimpiya o‘yinlarida ishtirok etdi, keyin Rossiya Premer-ligasiga qo‘shildi. “Armiyachilar” bilan birga mavsumlar oralig‘idagi yig‘inni o‘tamadi, hisob.

Bu omillarning barchasi uning yanada samarali o‘ynashiga ta’sir o‘tkazmay qolmadi. Lekin undan taxminan shu darajadagi o‘yinni kutgandim.

- O‘z salohiyatiga ko‘ra, Abbosbek Yevropaning jiddiy chempionatlari darajasidagi o‘yinchimi?
- Fayzullayev Yevropaning “top-5” chempionatlariga to‘liq mos keladigan o‘yinchi emas. Qolgan har qanday boshqa ligalarda Abbosdek futbolchiga talab yuqori.

- Masalan, Niderlandiyada o‘ynab keta oladimi?
- Ha, Niderlandiya va Turkiya kabi mamlakatlar ligalarida u juda ko‘p jamoalar uchun foydali o‘yinchiga aylana oladi.

- Ispaniya, Italiyada Fayzullayev o‘ynay olmaydimi?
- Bu mamlakat chempionatlari o‘yin saviyasi, darajasi, intensivligi o‘ta yuqori. Abbosbek esa, juda yuqori jismoniy ko‘rsatkichlarga ega emas. Bu uning ustun tomoni emas. Uning o‘yin uslubi ko‘proq Niderlandiya va Belgiya kabi chempionatlarga juda mos tushadi. Mana shu kabi chempionatlarda u o‘z salohiyatini yuz foiz ko‘rsata oladi.

Eslatib o‘tamiz, Abbosbek Fayzullayev “Paxtakor”dan SSKAga 2023 yilning avgustida 500 ming yevro evaziga ko‘chib o‘tgan. Bugungi kunda hujumkor futbolchimizning transferi summasi 8 million yevroga ko‘tarildi. “Zamin” yangiliklarini “Youtube”da kuzatib boring