Qishning eng koʻp kutilayotgan transferlari: kimlar qaysi klubga oʻtmoqda?

Yaqin vaqtlar ichida Evropada qishki transferlar darichasi ochiladi. OAVda har kuni ehtimoliy kelishuvlar haqida xabarlar chiqib turibdi. Yanvarda kimlar klubini oʻzgartiradi? Quyidagi materialda ehtimoli yuqori boʻlgan transferlar haqida ma'lumotga ega boʻlasiz.

«MYu» Reshford bilan xayrlashadi

Allaqachon 27 yoshni qoralagan Markus Reshford «Manchester Yunayted»ning yangi bosh murabbiyi Ruben Amorim bilan chiqishib keta olmadi. Portugaliyalik mutaxassis vingerning futbolga jiddiy munosabatda emasligidan norozi. Shu tufayli Amorim Markusni tarkibdan chiqardi, u oxirgi oʻyinlar qaydnomasiga ham kiritilmadi, «MYu» rahbariyati ham oʻz tarbiyalanuvchisi bilan xayrlashishga tayyor. The Guardian xabariga koʻra, klub Reshfordni transferga qoʻygan va yanvardayoq sotilishi mumkin — bu qarorni Amorim va klub rahbarlaridan biri Jim Retkliff kelishgan holda qabul qilgan. «MYu»dagilar ushbu futbolchining ketish vaqti keldi deb hisoblashmoqda.

Bir necha yil muqaddam Reshfordga «PSJ» jiddiy qiziqqan va vaqti-vaqti bilan boshqa ehtimoliy xaridorlar ham paydo boʻlib turgandi. Ammo endi uning uchun navbatda turganlar koʻp emas. The Telegraph xabariga koʻra, hali 27 yoshda boʻlgan Markusga Saudiya Arabistoni klublaridan qiziqish mavjud. «Al-Ittihod», «Al-Hilol», «An-Nasr», «Al-Ahli» va «Al-Qodisiya» kabi klublar uni tarkibida koʻrishga qarshi boʻlmaydi. Futbolchining oʻzi esa hozircha Evropani tark etishni rejalashtirmagan. Ammo u shu qishda ketmasa, bir yarim yilini va sport formasining qolganini ham yoʻqotadi.

Viktor Dyokeresh qayerga oʻtadi?

Shvetsiyalik 26 yoshli hujumchi 2024 yilning eng yaxshi toʻpurari boʻladi. Hozirda «Sporting» forvardi yil boshidan buyon barcha turnirlar dorasida urgan gollar soni (milliy jamoadagi natijalar ham qoʻshib hisoblanganda) 61 taga etgan, yil oxirigacha esa Portugaliya chempionatida «Benfika»ga qarshi kechadigan yana bitta oʻyin bor. Soʻnggi oʻn yillikda faqat Robert Levandovski bir kalendar yilida bundan koʻproq gol urgandi — 2021 yilda 69 ta.

Dyokereshning natijalari Ruben Amorim ketganidan keyin pasaydi, ammo bozorda unga talab pasayishi dargumon. Viktor Lissabonda juda yorqin oʻynamoqda. Transfermarkt uning transfer bahosini 75 million evro qilib belgilagan, bu narx hozirda markaziy hujumchiga ehtiyoj sezayotgan «Arsenal», «PSJ», «Real» va boshqa katta klublarga qimmatlik qilmaydi.

Ushbu skandinavning nomi birinchi navbatda uni jahonga tanitgan murabbiyining yangi jamoasi «MYu» bilan bogʻlashmoqda. Ruben Amorim qishda «Sporting»dan hech kimni olib kelmoqchi emasligini aytgandi, ammo qatorasiga uch magʻlubiyatdan keyin fikrini oʻzgartirishi mumkin. Lekin jamoada bu pozitsiyada Hoylund ham bor. Nima boʻlganda ham Dyokeresh shu qishda Evropadagi asosiy lotlardan biri maqomida boʻladi. U baribir qayergadir oʻtadi. Hozir boʻlmasa, yozda aniq.

Pepga yordam boradimi?

ESPN xabariga koʻra, yanvar oyida «Manchester Siti» yarimhimoyachi olishi aniq. Xosep Gvardiola jarohat tufayli mavsum oxiriga qadar Rodrining xizmatlaridan foydalana olmaydi. Murabbiy yangi futbolchiga muhtoj. «Manchester Siti» uchun ikkita asosiy variant — Martin Subimendi («Real Sosiyedad») va Bruno Gimarayns («Nyukasl»).

Transfermarkt uning transfer bahosini 60 million evro qilib belgilagan. U yozda «Liverpul»ga oʻtish taklifini rad etgandi, ammo mersisaydliklar undan hali umid uzishmagan. The Telegraph xabariga koʻra, «shaharliklar» yanvar oyida birinchi boʻlib taklif yuboradi. Unga «Real» va «Arsenal»dan ham qiziqish mavjud. Transfer muqarrar. Faqat 25 yoshli ushbu futbolchi qachon va qayerga ketishi aniq boʻlishi qolgan.

«Manchester Siti» markaziy himoyachi, forvard va oʻng qanot himoyachisi sotib olish variantlarini ham koʻrib chiqmoqda. Ammo birinchi navbatda — yarimhimoya chizigʻi uchun futbolchi kerak. Ammo top darajadagi yarimhimoyachi transferi amaldagi chempionlar uchun mavsumni qutqarib qolishga yordam beradimi?

«Liverpul» himoya qanotini mustahkamlaydimi?

Trent Aleksander-Arnold «Liverpul» bilan muddati 2025 yil yozida tugaydigan shartnomasini uzaytirmayapti. Tomonlar oʻrtasidagi muzokaralar qiyin kechmoqda, himoyachiga Madridning «Real» klubi talabgor. Katta ehtimol bilan, Trent yozda qadrdon klubini tark etadi. «Liverpul» esa allaqachon uning oʻrniga futbolchi topgan. Bild xabariga koʻra, mersisaydliklar «Bayer» himoyachisi Jeremi Frimpongning agenti bilan aloqaga chiqqan. 24 yoshli niderlandiyalik oʻng qanot uchun yaxshi nomzod.

The Athletic qayd etishicha, «Liverpul» Alfonso Devis uchun ham kurashda. Kanadalik himoyachi hali «Bavariya» bilan shartnomani uzaytirish yoki yozda erkin agent sifatida jamoasini almashtirish tanlovlari boʻyicha bir qarorga kelmagan. U — «Liverpul» uchun chap qanot pozitsiyasiga ideal variant.

Ingliz top-klubi radaridagi yana bir futbolchi — Rayan Sherki. Insayder Fabritsio Romanoga koʻra, «Liverpul» skautlari «Lion»ning bir necha oʻyiniga tashrif buyurib, 21 yoshli frantsuzni kuzatishgan.

Arteta nihoyat top-forvard oladimi?

«Arsenal»da ayniqsa bu mavsumda top «toʻqqizlik» yoʻqligi pand bermoqda. Kay Havers — yuqori saviyadagi futbolchi, ammo u klassik markaziy forvard emas. «Arsenal» xoʻjayinlari ushbu pozitsiya uchun futbolchi olish haqida oʻylashmoqda. TEAMtalk xabariga koʻra, londonliklar 24 yoshli Dushan Vlahovichni 2025 yil yanvaridayoq sotib olmoqchi. 24 yoshli serb esa — arzon lot emas. Transfermarkt boʻyicha uning transfer bahosi — 60 mln evro. London klubi «Nyukasl»da yorqin mavsum oʻtkazayotgan shvetsiyalik 25 yoshli Aleksander Isakka ham jiddiy qiziqmoqda, ammo klubi uni osonlikcha qoʻyib yuborishga rozi emas va uni shu qishda qoʻlga kiritish uchun «toʻpchilar» rad etib boʻlmaydigan taklif berishiga toʻgʻri keladi.

Shuningek, «Arsenal» chap qanot himoyachisi bilan ham xayrlashadi. The Athletic Kiran Tirni klubni tark etishi haqida xabar bergan. U erkin agent sifatida «Seltik»ka qaytishi mumkin. «Arsenal» u bilan shartnomani uzaytirish boʻyicha bandni faollashtirmagan, klubda bu pozitsiyada etarlicha futbolchi bor (Kalafiori, Lyuis Skelli, Zinchenko, Tomiyasu).

Pogba oʻziga klub topadimi?

Pol Pogba «Yuventus»ni tark etgan. 2023 yil oktyabridan buyon rasmiy oʻyinlardan maydonga tushmagan ushbu frantsuz diskvalifikatsiya muddati tugashi munosabati bilan 2025 yil martida maydonga qaytishi mumkin boʻladi. Yanvardan esa mashgʻulotlarni boshlash mumkin. Bunday darajadagi tekin yarimhimoyachi kimgadir kerak boʻlishi tayin. Braziliyadagi Bolavip nashri yozishicha, martda 32 yoshda boʻladigan Pogba «Korintians»ga oʻtishga rozilik bergan. RMC Sport esa «Marsel»dagilar ushbu futbolchini transfer qilish haqida oʻylayotganini xabar qilmoqda. Pogba uchun bu klubga oʻtish Frantsiya milliy jamoasiga qaytish imkoniyatlarini oshirishi mumkin. Avvalroq Angliyadagi nashrlar Polni «Manchester Siti» bilan bogʻlashgandi, ammo insayder Fabritsio Romano bu ma'lumotni rad etdi.

«Nyukasl» ikki top futbolchini koʻz ostiga olgan

Jurnalist Rudi Galetti «Nyukasl» Fikayo Tomoriga qiziqish bildirayotgani haqida xabar tarqatdi. «Milan» ushbu angliyalikni endi «daxlsiz» futbolchisi sifatida koʻrmayapti. Shuning uchun italyanlar takliflar uchun ochiq. Transfermarkt bu markaziy himoyachini 22 mln evroga baholagan.

«Nyukasl» tarkibini kuchaytirish uchun yana bir nomzod — Muhammad Quddus. Mirror Football xabariga koʻra, «Vest Hem» futbolchisi yanvardayoq klubini oʻzgartirishi mumkin. Ganalik 24 yoshli yarimhimoyachi uchun «Nyukasl»dan tashqari «Arsenal» va «Liverpul» ham da'vogar. Lekin futbolchi aynan «Sent-Jeyms Park»da koʻproq oʻyin amaliyotiga ega boʻlishi mmkin.

«Yuventus» yoppasiga sotib olmoqchi

Mavsum«Yuventus» uchun qiyin kechmoqda. Tyago Motta jamoasi A seriyada peshqadam «Atalanta»dan oʻn ochkoga ortda qolib ketgan. Sovrin uchun kurashga qaytish uchun esa yangi futbolchilar olib kelish kerak boʻladi. La Gazzetta dello Sport xabariga koʻra, «Yuventus» Jakomo Raspadori bilan shartnoma imzolamoqchi. Turinliklar «Napoli»ning ushbu hujumchisini anchadan buyon kuzatmoqda. Motta ham futbolchiga yuqori baho beradi, Jakomoni tarkibga qoʻshib olish uchun klub kelishuvga Danilo yoki Nikolo Fajiolini qoʻshishga ham qarshi emas.

Shuningdek, «Yuve» «Nyukasl»dan Sandro Tonalini sotib olish variantini koʻrib chiqmoqda. Inglizlar yarimhimoyachi uchun taxminan 55 mln evro soʻraydi. Turinga koʻchib oʻtish uchun yana bir nomzod — David Gansko. «Feyenoord»ning slovakiyalik himoyachisi — «Yuventus» uchun yanvardagi ustuvor variantlardan biri.

Osimhen APL klubiga oʻtadimi?

Il Mattino shov-shuvli xabar tarqatdi: «Manchester Yunayted» yanvarda Viktor Osimhenni transfer qilish variantini koʻrib chiqmoqda. Qayd etilishicha, mankunianliklar uning shartnomasidagi badal pulini toʻlashga tayyor. Nigeriyalik forvardning «Napoli» bilan shartnomasida 70 mln evro koʻrsatilgan. Uning «Galatasaroy» bilan ijara kelishuvida esa qaysidir klub uni sotib olish boʻyicha bandni faollashtiradigan boʻlsa, ijara shartnomasini ikki tomonlama rozilik asosida bekor qilish koʻrsatilgan.

«Real» afsonasi Argentinaga bormoqda!

Argentinadagi asosiy sport nashrlaridan biri boʻlmish TyC Sports shunday xabar berdi: «Boka Xuniors» Serxio Ramosni olmoqchi. Hozirda 38 yoshli ispaniyalik erkin agent maqomida. Shu tufayli «Boka» Ramos bilan yanvardayoq shartnoma imzolamoqchi. Jahon chempioni va Chempionlar ligasining toʻrt karra gʻolibi ekzotik ligada oʻynab koʻrishi mumkin. Serxio «Real»dan ketganidan keyin «PSJ»da ishlari yurishmadi va qadrdon klubi «Sevilya»ga qaytgandi. 2024 yil yozida esa ushbu klub bilan shartnomasi muddati tugaganidan buyon jamoasiz qolmoqda. “Zamin” yangiliklarini “Telegram”da kuzatib boring