Husanovga Gvardiola qiziqayotganiga “Lans” ustozi qanday munosabat bildirdi?

Evropa matbuoti taniqli insayder Fabritsio Romanoning insaydiga tayangan holda, “Manchester Siti” bosh murabbiyi Xosep Gvardiola qishki transferlar davrida “Lans” markaziy himoyachisi Abduqodir Husanovni olmoqchi ekani haqida xabar tarqatmoqda.

Bu ma'lumot ekspertlar, murabbiylar, muxlislar oʻrtasida keng muhokamalarga sabab boʻlmoqda.

Xususan, ayrim manbalar bugungi kunda 20 yoshli oʻzbek futbolchisiga Angliya Premer-ligasining kamida etti klubi da'vogarlik qilayotgani, ular orasida “Tottenxem” va “Nyukasl” qishki transferlar oynasi vaqtida “Manchester Siti” bilan raqobatlashayotganini yozmoqda.

Hozir “Lans” boshqa klublar tomonidan “qamal”ga olingan, bu halqaga yangidan yangi xaridorlar qoʻshilib bormoqda.

Husanovning transferi haqidagi xabarlarda “Lans”ga taklif qilinayotgan summa 30 million evrodan osha boshlagani toʻgʻrisida ma'lumotlar bor. Ayniqsa, Angliyaning ketma-ket toʻrt karra chempion boʻlgan yagona jamoasi – “Manchester Siti” bosh murabbiyi Xosep Gvardiola oʻzbek futbolchisiga e'tibor qaratgani bu mavzu dolzarbligini yanada oshirdi.

“Lans” bosh murabbiyi Uill Still ham manchesterliklarning qiziqishi fonida Abduqodir Husanov transferi masalasiga munosabat bildirishiga toʻgʻri keldi.

- “Lans” uchun transfer oynasi ancha jonli oʻtadigan koʻrinadi. Jamoamiz qiziqayotgan oʻyinchilar bor, bizning futbolchilarni soʻrayotgan klublar ham bor. Bu hammasi murakkab jarayon. Oʻzimizga nima kerakligini, nima qilish lozimligini bilamiz. Lekin transfer bozori endi ochildi va hali bu borada amaliy natijalar boʻlgani yoʻq.

Abduqodir Husanovni jiddiy kuzatishyapti. Yaqinda “Manchester Siti” ustozi Xosep Gvardiola uni olmoqchiligi haqida xabarlar tarqaldi. Bu ma'lumotlarni tasdiqlay olamanmi?

Har qanday holatda ham Abduqodir Husanov koʻpchilik uchun orzuga aylangan muhim oʻyinchi boʻlib qolmoqda. Chunki u juda yuqori salohiyatga ega yosh oʻyinchi. Abduqodir mavsum boshidan beri yuqori saviyada oʻynay olishini koʻrsatib kelmoqda. Unga boʻlayotgan e'tibordan hayratda emasman.

Butun dunyo Husanovga juda katta klublardan qiziqish boʻlishini kutayotgan edi, deb oʻylayman. Bunday futbolchini soʻrab, murojaat qilishlari tabiiy.

Lekin shuni ta'kidlashim kerakki, Husanov transferi borasida aniq ma'lumotlarni berishim uchun avval boshqa klublarning orzu-istaklari rasmiy takliflarga koʻchishi va bizga kelib tushishi lozim.

Futbol va transfer oynasining goʻzal jihati shundaki, bu jarayon davom etar ekan har doim qiziqarli ma'lumotlar aylanib yuraveradi, - dedi Uill Still.

Eslatib oʻtamiz, Abduqodir Husanov 2023 yilning yozidan beri “Lans” safida oʻynab kelmoqda. Ayniqsa, joriy mavsumda legionerimiz oʻziga berilgan kichik imkoniyatdan unumli foydalanib, jamoaning asosiy figurasiga aylanib oldi.

Kuni kecha 20 yoshli markaziy himoyachimiz oʻtkazilgan maxsus soʻrovnomada gʻolib chiqib, “Lans”ning 2024 yildagi eng zoʻr futbolchisi, deb topildi. Abduqodir Transfermarkt portali tomonidan 12 million evroga baholanmoqda. Hamyurtimizning lansliklar bilan shartnomasi 2027 yilning 30 iyunigacha davom etishi belgilangan. “Zamin” yangiliklarini “Instagram”da kuzatib boring