Insayder Romano Husanov transferi haqida yangi post qoldirdi!

Taniqli futbol insayderi Fabritsio Romano “Manchester Siti”ga oʻtayotgan Abduqodir Husanov boʻyicha tvit qoldirdi.

Uning yozishicha, manchesterliklar 2024 yilning dekabr oyidan boshlab Abduqodir Husanov transferi masalasida ishni boshlagan. Gvardiola ham futbolchi bilan shartnoma tuzilishini ma'qulladi.

“Here we go, coming soon”, — deya qoʻshimcha qilgan Romano.

Yana bir insayder Sebastian Denisga koʻra, Husanov va “Mancheste Siti” oʻrtasidagi kelishuv 2030 yilning yoziga qadar tuziladi. Klub “Lans”ga 50 mln yevro toʻlab berishga tayyor.

Avvalroq “Manchester Siti” Abduqodir Husanov transferi borasida “Lans”ga rasmiy taklif yuborgani haqida xabar berilgandi.

Shuningdek, Abduqodir Husanov Buyuk Britaniya vizasiga ariza topshirgani haqida ma'lumot berilgan edi.

Husanov Angliyaning “Chelsi” va “Nyukasl” klublari, Ispaniyaning “Real”, shuningdek, Fransiyaning “PSJ” jamoasi qiziqishlari doirasida ekani xabar qilingandi. Agentlar Parij variantini oʻyin amaliyoti kafolati yoʻqligi sababli rad etgan.

Avvalroq klub direktori futbolchining yanvarda jamoani tark etishi mumkinligi, ammo hali rasmiy takliflar boʻlmagani haqida ma'lum qilgandi.

Husanov 2023 yilda Belarusning “Energetik-BGU” klubida oʻynagan va shu yilning iyul oyida 100 ming yevro evaziga “Lans”ga transfer boʻlgandi.

Husanov Fransiya klubi safida 31 ta oʻyinda maydonga tushib, bir marta golli uzatma amalga oshirdi. Uning frantsuz klubi bilan tuzgan shartnomasi 2027 yilning iyuniga qadar amal qiladi.

Transfermarkt ma'lumotiga koʻra, uning bozor qiymati 12 million yevroga baholangan. “Zamin” yangiliklarini “Telegram”da kuzatib boring