Abduqodir Husanovning agentlari transferga oydinlik kiritdi

Abduqodir Husanov transferi atrofidagi ma'lumotlar tobora koʻpayib bormoqda. 20 yoshli markaziy himoyachiga da'vogar boʻlgan Evropaning oʻndan ziyod klublari faoliyatini yoritib kelayotgan ommaviy axborot vositalarining har biri oʻzbek futbolchisi haqida tinimsiz axborot tarqatib kelmoqda.

Ta'kidlash joizki, Oʻzbekiston futboli tarixida birorta oʻzbek futbolchisi bunchalar koʻp darajada media nazari ostida boʻlmagan.

Turli manbalar tarqatayotgan soʻnggi ma'lumotlarga qaraganda, Abduqodir Husanov ayni paytda “Lans” safida emas va navbatdagi uchrashuvlarga tayyorgarlik koʻrmayapti.

Oʻzbek legioneri transfer masalasini oxiriga etkazish arafasida. “Manchester Siti” uni oʻz safiga qoʻshib oladigan boʻldi, Xosep Gvardiola oʻzbekistonlik yigitga imkon berishga qaror qildi va transferni ma'qulladi.

Husanovning transferi oʻzbek futbolida mutlaq rekord boʻladi. Manchesterliklar iste'dod sohibi uchun gʻaznadan 50 million yevro ajratishga qaror qilgan.

Bungacha eng yirik transfer Eldor Shomurodov nomi bilan bogʻliq boʻlgandi. 2021 yilning yozida “Jenoa”dan oʻzbek futbolchisini olib oʻtish uchun “Roma” umumiy hisobda 19,6 million yevro sarflagani qayd etilgan.

Rossiyaning “Match TV” sayti oʻzbek futboli vakillari faoliyatini yoritishga alohida e'tibor qaratib keladi. Bu manba Abduqodir Husanov transferiga oydinlik kiritish maqsadida legionerimiz manfaatlarini himoya qilib kelayotgan Football Group LLC agentligiga murojaat qildi.

— Koʻplab ommaviy axborot vositalari Abduqodir Husanovning “Manchester Siti”ga oʻtayotganini yozmoqda. Bu haqiqatmi? Muzokara oʻtkazilyaptimi?
— Ha, bu ayni haqiqat.

— Shartnoma imzolandimi?
— Hozir muzokaralar davom etmoqda.

Ta'kidlash joizki, aksariyat ishonchli va nufuzli manbalar tomonlar oʻzaro hamkorlik masalasini deyarli hal qilib boʻlgani haqida xabar tarqatmoqda.

Abduqodir Husanov ayni paytda Buyuk Britaniyaning ishchi vizasini olish uchun hujjatlarini topshirgan. Shu masala hal boʻlishi bilan tomonlar besh yillik shartnomaga imzo chekishi aytilyapti.

“Bunyodkor”da tarbiyalagan, “Energetik-BGU”da professional faoliyatini boshlagan, “Lans”da Evropaga tanilgan legionerimiz endi katta zamonaviy futbol vatani Angliyani zabt etishiga umid qilib qolamiz. “Zamin” yangiliklarini “Telegram”da kuzatib boring