Abduqodir Husanovning transferidan “Bunyodkor” qancha haq oladi?

Abduqodir Husanov 50 mln yevro evaziga “Lans”dan “Manchester Siti”ga oʻtsa “Bunyodkor” 2 foiz haq oladi. Bu haqda jurnalist Nodirxoʻja Yoʻldoshev ma'lum qildi.

^{Abduqodir Husanov “Bunyodkor” tarkibida
Foto: “Bunyodkor”}
Uning yozishicha, FIFA reglamentiga koʻra, 12-15 yoshgacha 0.25 foizdan jami 4 mavsumga 1 foiz va 16-17 yosh uchun 0.50 foizdan 1 foiz berilishi belgilangan.

Transfer summasidan 2 foiz 1 mln yevroni (14,3 mlrd soʻm) tashkil etadi.

Avvalroq Husanov va “Man Siti” oʻrtasidagi kelishuv 2030 yilning yoziga qadar tuzilishi xabar qilingandi. Klub “Lans”ga 50 mln toʻlab berishga tayyor ekanligi, shuningdek, “Manchester Siti” Abduqodir Husanov transferi borasida “Lans”ga rasmiy taklif yuborgani hamda Husanov Buyuk Britaniya vizasiga ariza topshirgani haqida xabar berilgandi.

Husanov Angliyaning “Chelsi” va “Nyukasl” klublari, Ispaniyaning “Real”, shuningdek, Fransiyaning “PSJ” jamoasi qiziqishlari doirasida ekani xabar qilingandi. Agentlar Parij variantini oʻyin amaliyoti kafolati yoʻqligi sababli rad etgan.

Klub direktori futbolchining yanvarda jamoani tark etishi mumkinligi, ammo hali rasmiy takliflar boʻlmagani haqida ma'lum qilgandi.

Husanov 2023 yilda Belarusning “Energetik-BGU” klubida oʻynagan va shu yilning iyul oyida 100 ming yevro evaziga “Lans”ga transfer boʻlgandi.

Husanov Fransiya klubi safida 31 ta oʻyinda maydonga tushib, bir marta golli uzatma amalga oshirdi. Uning frantsuz klubi bilan tuzgan shartnomasi 2027 yilning iyuniga qadar amal qiladi.

Transfermarkt ma'lumotiga koʻra, uning bozor qiymati 12 million yevroga baholangan. “Zamin” yangiliklarini “Telegram”da kuzatib boring