Uni "Manchester Siti"da nimalar kutmoqda? Husanovning sarguzashtlari oʻzbekistonlik murabbiylar nigohida

Abduqodir Husanovning Evropadagi ajoyib oʻyinlari barchaning diqqat markazid boʻlib turibdi. Xususan, futbolchimizning "Manchester Siti"ga yoʻl olishiga xorij ommaviy axborot vositalari, mutaxassislar munosabatlarini bildirmoqda. Biz ham bu borada oʻzimizning mahalliy murabbiylarimizning fikrlariga quloq tutdik.

Xayrulla Karimov (OKMK fitness murabbiyi, Oʻzbekiston terma jamoasi sobiq futbolchisi) - Toʻgʻrisi bundan juda xursand boʻldim. Abduqodirni oʻyinlarini anchadan buyon kuzatib kelaman. APLda oʻz oʻyinlarini koʻrsatib ketishiga tilakdoshman. Uning salohiyati juda yuqori. Gvardiola dunyoning eng zoʻr murabbiyi. Bunday murabbiyning qoʻliga tushishning oʻzi katta baxt. "Manchester Siti" yanada oʻsishi uchun yaxshi imkoniyat deb oʻylayman. Ular ham oʻzimizga oʻxshagan odamlar, kosmosdan tushib qolmagan. Shu bois bu erda ortiqcha bosim, xavotirni oʻylashga hojat yoʻq. Inson qilgan ishni inson qila oladi. Yangi chempionatga tezda koʻnikib ketadi va oʻz odobi bilan koʻp narsaga erishadi. Istardimki, bu ish yanada xayrli boʻlib Oʻzbekistondan koʻplab futbolchilar kuchli chempionatlarda toʻp tepishsin.

Server Jeparov (Oʻzbekiston terma jamoasi sobiq sardori) - Abduqodir oʻz mehnati bilan jahonning eng buyuk jamoasiga borishga munosib edi. Bu oʻzbek futboli tarixidagi APL tomon ilk oʻtish hisoblanadi. Tabiiyki, uni bu yoʻlda tayyorlagan barchaga rahmat aytishimiz kerak. Nima ham derdim, mamlakatimiz futboli uchun bu katta tashlangan qadam. Omadini bersin deb qolaman.

Timur Kapadze (Oʻzbekiston MTJ, OTJ sobiq murabbiyi) - Abduqodir Husanov uchun hammamiz xursandmiz va "Manchester Siti" libosida koʻrishni intiqlik bilan kutmoqdamiz. Oʻzimizning oʻzbek yigitining grand jamoaga, top murabbiy qoʻliga borayotgani yoqimli. Bunday jamoalar oʻz-oʻzidan futbolchi olmaydi. Har tomonlama kuzatishadi. Futbolchimizni yuqori baholayotgani ham koʻp narsadan darak berib turibdi. Oʻylaymanki, bu oʻtish bizning futbolimiz uchun katta plyus. Boz ustiga APLda oʻynaydi. Husanovda kuch, mahorat, yosh hamma narsasi bor. U yana oʻsadigan bola. Unga dunyoning eng yaxshi himoyachisi boʻlishini tilayman.


Manba: Championat.asia “Zamin” yangiliklarini “Telegram”da kuzatib boring