Rossiyalik futbol agenti: "Husanov qanaqasiga 50 mln turadi? Maksimum – 20!"

Rossiyalik futbol agenti Dmitriy Selyuk "Sport-Ekspress" nashriga bergan intervyusida "Lans"ning oʻzbekistonlik himoyachisi Abduqodir Husanovning "Manchester Siti"ga oʻtishi haqida keskin fikrlarni bildirdi.

"Men Xusanovni anchadan beri bilaman. U Belarusning “Energetik-BGU” jamoasida oʻynaganida futbolchim bilan bir xonadonda yashagan. Koʻrib turganingizdek, u oʻzini koʻrsatgan va "Lans" qiziqishiga sabab boʻlgan. Keyinroq Fransiyaga yoʻl olgan. Shu erda savol tugʻiladi: nega Rossiya klublari uni payqamadi? Bilasizmi, ba'zan Belarus va Oʻzbekistondan boʻlgan futbolchilarni RPL sport direktorlariga taklif qilsangiz, ular sizga xuddi siz xokkeychi haqida gapirayotgandek qarashadi... Gʻalati hikoya, alohida mavzu. Shunchaki tez-tez oyoqlaringizga qarashingiz kerak, bulutlarda uchib, yulduzlarga boqmasdan. Agar sizda 10 mln boʻlsa, albatta, kimnidir olib kelasiz. Lekin, tushuning, Husanovni topish pul toʻlashdan koʻra qiyinroq.

Husanovning Fransiyaga moslashishi uchun biroz vaqt kerak boʻldi. Bu mavsumda esa u oʻzini yaxshi koʻrsatdi va endi, aytganlaridek, uni "Manchester Siti" soʻrab keldi.

Yana bir narsa, OAVda paydo boʻlgan summalardan hayratdaman. Qanaqa 50 million? Nimalar deyapsiz? Men bunga ishonmayman. Qandaydir oʻyin boʻlayotganga oʻxshaydi. 15 mlnga ishongan boʻlardim. Maksimum – 20. 40 mln va qandaydir bonuslar haqida yozishmoqda.

Boshqa tomondan, "Siti"da juda koʻp pul bor. Ehtimol, ular bunday xaridni amalga oshirishga qaror qilishgan. Bilmadim... Lekin 50 million, albatta, juda koʻp! Dunyoda markaziy himoyachi uchun shunday pul toʻlaydigan koʻplab klublarni bilasizmi? Men – yoʻq.

Eshiting, yozda "Roma" Dovbikni "Jirona"dan sotib oldi. 30 million evaziga. Bunda esa 50 haqida gap ketmoqda...", – dedi Selyuk. “Zamin” yangiliklarini “Telegram”da kuzatib boring