Fabritsio Romano Husanovning “Manchester Siti”ga transferi boʻyicha ma'lumot berdi

Futbol transferlari boʻyicha ma'lumot tarqatuvchi mashhur insayder Fabritsio Romano yana bir bor hamyurtimiz Abduqodir Husanovning “Manchester Siti”ga transferi tafsilotlariga toʻxtaldi.

- "Abduqodir Husanovning “Manchester Siti”ga oʻtishida hech qanday muammo yoʻq. “Lans” klubi bilan transfer borasidagi barcha hujjatlar tayyor, faqat oʻyinchi uchun viza kutilyapti, shundan soʻng shartnoma imzolanishi va rasmiylashtirilishi kutilmoqda.

Abduqodir Husanov ham, Vitor Rays ham “Manchester Siti”da oʻynaydi", deb yozdi Romano X (sobiq Twitter) ijtimoiy tarmogʻidagi sahifasi orqali.

Oʻzbekiston terma jamoasi hamda “Lans” klubi futbolchisi Abduqodir Husanov “shaharliklar” bilan 2029 yilgacha shartnoma imzolashga kelishib olgani haqida xabar berilgan edi. Transfer summasi 40 million yevroga kelishilgan.

Ma'lumot uchun, “Lans” klubi Abduqodir Husanovni 2023 yil iyul oyida Belarusning “Energetik-BGU” klubidan 100 ming yevroga sotib olgandi.

Abduqodir Husanov Fransiya klubi safida 31 ta oʻyinda maydonga tushib, bir marta golli uzatma amalga oshirdi. Uning frantsuz klubi bilan tuzgan shartnomasi 2027 yilning iyuniga qadar amal qilar edi.

Transfermarkt ma'lumotiga koʻra, Abduqodir Husanovning narxi 12 million yevroga baholangan. “Zamin” yangiliklarini “Telegram”da kuzatib boring