Husanovga «PSJ» va «Real» ham qiziqish bildirdi, ammo «Siti» bilan transfer poygasiga qoʻshilmadi

Oʻzbekiston milliy jamoasi hamda «Lans» klubi himoyachisi Abduqodir Husanov ushbu hafta oxirigacha «Manchester Siti» a'zosi sifatida rasman e'lon qilinishi kutilmoqda.

Daily Mirror jurnalisti Rayan Teylorning yozishicha, Fransiya chempionatida yorqin oʻyinlari bilan ajralib turgan oʻzbekistonlik 20 yoshli futbolchiga «PSJ» hamda «Real» ham qiziqish bildirgan, ammo bu klublar «Manchester Siti» bilan transfer kurashiga qoʻshilishni xohlamagan.

Qayd etilishicha, Abduqodir Husanov ham uning transferini shaxsan Pep Gvardiola ma'qullaganini bilgach, faqat «Manchester Siti»ga oʻtishni istagan.

Manba xabariga koʻra, Husanovning Buyuk Britaniyaga ishlash huquqini beruvchi vizasi tayyor boʻlgan va u juma kuni Fransiyadan Angliyaga kelib, tibbiy koʻrikdan oʻtishi kutilmoqda.

Eslatib oʻtamiz, «Siti» Husanov uchun «Lans»ga 33,75 mln funt (40 mln yevro) sterling toʻlaydi. Unga Manchester klubidan tashqari, Angliyaning «Nyukasl», «Vest Hem», «Everton» klublari ham qiziqish bildirgan edi. “Zamin” yangiliklarini “Telegram”da kuzatib boring