Abduqodir Husanov transferi boʻyicha muhim yangilik!

Abduqodir Husanov “Manchester Siti”ning 2025 yildagi birinchi transferi boʻlishi kutilmoqda. Ayni paytda “shaharliklar” legionerimizning oʻzining roziligini olgan, “Lans”ni oʻyinchini qoʻyib yuborishga koʻndirgan.

Kelishuvga erishilganiga bir necha kun boʻlganiga qaramay, transfer hali rasman e'lon qilinmagani turli gap-soʻzlarga sabab boʻldi.

Angliya futbolini yoritib kelayotgan nufuzli manbalar Abduqodir Husanov transferi boʻyicha soʻnggi ma'lumotlar va izohlarni e'lon qila boshladi. Xususan, cityxtra.co.uk portali transferga oid quyidagi tahlilni muxlislar e'tiboriga havola qildi.

- Juma kuni “Manchester Siti” yangi yilning birinchi transferini e'lon qilish oldidan tibbiy koʻriklarni oʻtkazadigan boʻldi.

Sport direktori Chiki Begiristayn va uning hamkasblari yangi nomlarni kashf etish va qishki transferlar davrida Xosep Gvardiola boshchiligida amaldagi chempion jamoa tarkibini shakllantirish borasida katta ishlarni amalga oshirmoqda.

Klub yanvarda toʻrttaga yangi oʻyinchi olishi rejalashtirilgan. Ulardan ikki nafari markaziy himoyachilar ekani aniq boʻldi va yana biri Erling Xolandga raqobat qiladigan hujumchi Umar Marmush boʻladi.

“Manchester Siti” mutasaddilari “Palmeyras” klubi bilan kelishuvga erishgan va ularning 19 yoshli markaziy himoyachisi Vitor Reys Buyuk Britaniyaga etib kelishi kutilmoqda.

Oʻzbek himoyachisi Abduqodir Husanovni oʻzining asosiy transfer nishoni sifatida belgilagan “Etixad Stedium” egalari oʻtgan hafta oxirida “Lans” bilan bu transfer boʻyicha barcha masalalarni ijobiy yakunlab boʻlgan edi. “Shaharliklar” hozir toʻlanadigan mablagʻlarni shakllantirish bilan band.

Endi 40 million yevrolik transfer doirasida Abduqodir Husanov juma kuni tibbiy koʻrikdan oʻtadi. Bu ma'lumotlarni The Mirror nashri eksperti Rayan Teylor ham tasdiqladi.

Soʻnggi ma'lumotlarga qaraganda, klublar tomonidan barcha hujjatlar tasdiqlangan va imzolangan, biroq 20 yoshli futbolchi “Manchester Siti”ga rasman oʻtishdan oldin unga mamlakatda ishlash huquqini beradigan ishchi vizasi berilishini kutmoqda.

Ta'kidlash joizki, oʻzbekistonlik himoyachiga “Pari Sen-Jermen” va “Real Madrid” ham jiddiy qiziqish bildirgan edi. Biroq Xosep Gvardiola bu oʻyinchining transferini shaxsan ma'qullaganidan keyin Husanov “Manchester Siti”ni tanladi.

Mana endi futbol hamjamiyati yilning ertaknamo transferi rasman oʻz tasdigʻini topishini kutmoqda, - deb yozdi cityxtra.co.uk portali.

Eslatib oʻtamiz, “Manchester Siti” Abduqodir Husanov transferi uchun “Lans”ga 40 million yevro badal puliga qoʻshimcha tarzda 10 million yevro bonus toʻlaydigan boʻldi. Shu tariqa, oʻzbek futbolchisi “Lans” tarixida eng qimmatbaho transfer egasiga aylanadi. “Zamin” yangiliklarini “Telegram”da kuzatib boring