Rossiyaning mashhur sport portali “Manchester Siti” klubiga oʻtishi aniq boʻlgan Abduqodir Husanovning narxi bir yil ichida keskin oshganiga e'tibor qaratdi.
“Sovetskiy sport” yangiliklar portali Oʻzbekiston terma jamoasi himoyachisi Abduqodir Husanov haqida oʻz taassurotlari bilan boʻlishdi.
“Atigi bir yarim yil ichida Abduqodir Husanovning narxi 100 ming yevrodan 40 million yevroga koʻtarildi.
Bir yil ichida narx 400 barobarga oshishi — shunday boʻlishi mumkinmi? Aftidan, shunday. Abduqodir Husanov – oddiygina talaffuz qilish qiyin ismga ega oʻzbekistonlik futbolchi emas, balki yanvar oyining boshidagi asosiy yangiliklarning qahramonlaridan biri. 2023 yil iyul oyida “Lans” himoyachini Belarusning “Energetik-BGU” klubidan zamonaviy futbol mezonlari boʻyicha kulgili narx – 100 ming yevroga sotib olgan edi.
Husanovning Fransiya chempionatidagi birinchi mavsumi, ya'ni yangi darajaga moslashish davri unchalik ajoyib boʻlmadi, lekin yomon ham emas. Ammo oʻshandan beri himoyachi oʻz oʻyinida ulkan progressni namoyish etdi.
Joriy mavsumda Husanov oʻtgan mavsumga qaraganda koʻproq vaqt maydonda boʻldi. Bundan tashqari, uning oʻyin sifati va qaror qabul qilish darajasi sezilarli darajada oshdi. Shu sababli eng kuchli klublar futbolchiga qiziqish bildirishga shoshildi.
Ayni paytda himoyachi Liga 1 da toʻpni olib qoʻyishlar soni boʻyicha eng yaxshi beshlikdan joy olgan – 26 marta. Bu uning oʻyinni tushunish darajasi yuqori ekanidan dalolat beradi. Shuningdek, u 56 bor hujumlarni “tozalash”da ishtirok etgan. Koʻpchilik Husanovning ishonchliligini alohida ta'kidlamoqda – joriy mavsumda “Lans” uning xatosidan keyin gol oʻtkazib yubormagan.
Oktyabr oyida u Fransiya chempionatining eng yaxshi yosh futbolchisi deb topildi – bu futbolchining yana bir yutugʻi” – deyiladi maqolada.
Oʻzbekiston terma jamoasi hamda “Lans” klubi futbolchisi Abduqodir Husanov “shaharliklar” bilan 2029 yilgacha shartnoma imzolashga kelishib olgani haqida xabar berilgan edi. Transfer summasi — 40 million yevro.
Ma'lumot uchun, “Lans” Husanovni 2023 yil iyul oyida “Energetik-BGU”dan 100 ming yevroga sotib olgandi.
Husanov Fransiya klubi safida 31 ta oʻyinda maydonga tushib, bir marta golli uzatma amalga oshirdi. Uning frantsuz klubi bilan tuzgan shartnomasi 2027 yilning iyuniga qadar amal qiladi.
Transfermarkt ma'lumotiga koʻra, uning bozor qiymati 12 million yevroga baholangan. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
