“Manchester Siti” yaqinda kuzatilgan muvaffaqiyatsizliklardan keyin tarkibini tartibga solishga kirishdi.
“Shaharliklar” qishki transferlar vaqtida eng muammoli hisoblangan himoya chizigʻiga Abduqodir Husanov va Vitor Reys kabi yangi avlod markaziy himoyachilarini, hujumga “Ayntraxt” toʻpurari Umar Marmushni oldi.
Shu bilan birga klub mutasaddilari bosh murabbiy Xosep Gvardiola suyangan futbolchilar bilan shartnomalarni yangilay boshladi.
Xususan, jamoaning eng zoʻr toʻpurari Erling Xoland Manchesterda 2034 yilning yarmigacha qolish uchun yangi bitimga imzo chekdi.
Manbalarda ta'kidlanishicha, norvegiyalik forvardning avvalgi shartnomalarida uni transfer qilish huquqini beruvchi barcha bandlar yangi bitimdan olib tashlangan. Xoland bir imzo bilan klubda eng katta maosh oladigan oʻyinchiga aylandi.
24 yoshli Erling Xoland Norvegiyaning “Bryune” va “Molde” klublaridan etishib chiqqan. Bir yil Avstriyaning “Zalsburg” jamoasida toʻp tepganidan keyin 2020 yilning yanvarida uni “Borussiya Dortmund” oʻz safiga qoʻshib oldi.
Mohir toʻpurar Angliya Premer-ligasiga 2022 yilning yozida koʻchib oʻtdi. Xoland hozirga qadar klublar miqyosidagi musobaqalarda jami 309 ta uchrashuvda ishtirok etib, oʻz hisobiga 246 ta gol va 51 ta assist yozdirib qoʻygan.
Bundan tashqari, mohir toʻpurar xalqaro miqyosda ham tinimsiz gol urmoqda. Erling Norvegiya milliy terma jamoasi safida 39 ta oʻyinda qatnashib, raqiblar darvozasini 38 marotaba ishgʻol qilgan.
Eslatib oʻtamiz, Abduqodir Husanov faoliyatini “Manchester Siti”da davom ettirish imkoniyatiga ega boʻldi. “Shaharliklar” Oʻzbekiston milliy terma jamoasi markaziy himoyachisi uchun Fransiyaning “Lans” klubiga jami 50 million yevro oʻtkazib berishga rozi boʻlgan. Manchesterliklar oʻzbekistonlik charm toʻp ustasiga uzoq muddatli shartnoma bergan. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
