Maksim Shaskix Husanovning “Manchester Siti”ga oʻtganini qanday baholadi?

Abduqodir Husanovning “Manchester Siti”ga koʻchib oʻtgani hamon keng muhokama qilinmoqda, turli axborot manbalari futbol olamidagi taniqli shaxslarning oʻzbek futbolchi transferi haqidagi fikr-mulohazalarini e'lon qilyapti.

Xususan, Ukraina nashrlari bu mamlakat futbolida chuqur iz qoldirgan oʻzbekistonlik hujumchi Maksim Shaskixning Abduqodir Husanov transferi boʻyicha munosabatini e'lon qildi.

Ma'lumki, Maksim Kiyevning “Dinamo” klubi safida samarali faoliyat yuritgan, Ukraina chempionatida eng koʻp gol urgan toʻpurar hisoblanadi. Hamyurtimiz bu jamoa safida Evropa Chempionlar ligasidagi gollari orqali oʻzini koʻrsata olgan.

Maksim Shaskixning ukrainalik jurnalistlar bergan savollarga javobini oʻzbekistonlik futbol ishqibozlari e'tiboriga havola etamiz.

— Maksim Aleksandrovich, oʻzbek himoyachisi Abduqodir Husanovning “Manchester Siti”ga transferini qanday baholaysiz?

— Birinchidan, Angliyaga futbolchilarni shunchaki olishmaydi, ayniqsa, yuqori darajadagi top-klublarga.

Ikkinchidan, “Manchester Siti” yangi oʻyinchilarni jamoa tarkibidagi futbolchilar sonini koʻpaytirish uchungina sotib olmaydi. Husanovga faqatgina “Manchester Siti” da'vogarlik qilgani yoʻq.

Bu futbolchini olish uchun katta navbat vujudga keldi. Evropaning deyarli barcha top-klublari da'vogarlik qildi.

Endi buyogʻiga hammasi Husanovning oʻzini qoʻlida, hammasi uning oʻziga bogʻliq.

Abduqodir haqiqatan “Manchester Siti” transferiga loyiq oʻyinchi. U bunga oʻzining mehnatkashligi, oʻyini, borini berib oʻynashi, ishtiyoqi va boshqa xususitlarini namoyish qilish orqali erishdi. “Manchester Siti”dagi faoliyati muvaffaqiyatli chiqadi, deb oʻylayman.

Faqat Husanovga darrov asosiy tarkibdan joy berishadimi yoki yoʻq, mana shunisini bilmayman. Yaqin orada buni ham bilib olamiz.

— “Manchester Siti” keyingi paytdagi natijalarini inobatga olib, balki Xosep Gvardiola Abduqodir Husanovni darrov asosiy tarkibga kiritar...

— Boʻlishi mumkin. “Manchester Siti” hozir qayd etayotgan koʻrsatkichlari bilan maqtana olmasligini inobatga olib, balki Husanovning imkoniyatlaridan toʻliq foydalanishga urinib koʻrar. Qani kutamiz!

Ta'kidlash joizki, Abduqodir Husanov bugungi kunda “Manchester Siti”dagi mashgʻulotlarini boshlab yuborgan. Bosh murabbiy Xosep Gvardiola oʻzbek futbolchisining jismoniy imkoniyatlarini yuqori baholamoqda.

Baribir har qanday bosh murabbiy ham qimmat narxga olingan yangi oʻyinchiga oʻzini koʻrsatish uchun imkon berishi tabiiy. Abduqodir Husanov ana shu imkoniyatlardan unumli foydalanib, “Lans”da boʻlgani kabi asosiy tarkibdan muqim oʻrin olishni uddalashiga umid qilamiz. “Zamin” yangiliklarini “Telegram”da kuzatib boring