"Siti" - "Chelsi": Husanovning asosiy tarkibda maydonga tushishi uchun sabablar

Ertaga APL doirasida "Manchester Siti" oʻz maydonida "Chelsi"ni qabul qiladi. Ushbu bellashuv katta afishasi bilan birgalikda APLda kuchli toʻrtlikka kirish uchun kurash boʻlayotgani bilan ham ahamiyatlidir.

Ayni vaqtda "shaharliklar" APL turnir jadvalida 38 ochko bilan 5-oʻrinni band etib turibdi. Ulardan bir pogʻona yuqorida aynan 40 ochkosi bor "aristokratlar" bormoqda. Ushbu klublar oʻrtasidagi birinchi davrada boʻlib oʻtgan bahsda Pep Gvardiola shogirdlari Erling Xoland hamda Mateo Kovachich tomonidan kiritilgan gollar evaziga zafar quchgandi. Oʻsha paytda "Siti"da hammasi joyida edi va favoriti aniq bahsda aynan favoritlar zafar quchgandi. Biroq ayni dam vaziyat butunlay oʻzgacha.

Jamoalarning holati haqida:

"Manchester Siti"

"Manchester Siti" oʻzi uchun qiyin davrni boshdan kechirmoqda. Jamoa Premer-ligada ishonchli oʻyin koʻrsatishni boshladi, ammo ungacha 13 uchrashuvning atigi 1 tasida gʻalaba qozonib, "Siti"ga umuman yarashmaydigan koʻrsatkichlar qayd etib kelayotgandi. Bundan tashqari, Manchester klubining xalqaro maydondagi ishlari ham u qadar yaxshi emas. Gvardiola shogirdlari hafta oʻrtasida boʻlib oʻtgan EChL oʻyinida PSJga 2:4 hisobida magʻlub boʻldi. Ayni vaqtda "Siti" EChL turnir jadvalida 7-turdan soʻng 8 ochko bilan 25-oʻrinni band etib turibdi. Turnirning asosiy favoritlaridan birining guruh bosqichidayoq musobaqani tark etishi ehtimoli bor. Soʻnggi turda ular gʻalaba qozona olmasa, keyingi bosqich yoʻllanmasidan mahrum boʻlishadi.

"Chelsi"

"Chelsi" oxirgi mavsumlarda koʻp va qimmat transferlarga qoʻl urib, natijalar nuqtai-nazaridan tanqidlarga uchrab kelayotgandi. Biroq London grandi joriy mavsumda tanqidlarga etarlicha javob qaytara olmoqda. Klub Evropa Konferentsiyalar ligasida yuz foizlik natija koʻrsatdi. APLda esa ayni vaqtda toʻrtinchi oʻrinda (soʻnggi mavsumlardagi qoniqarsiz natijalardan soʻng ular uchun bu ijobiy koʻrsatkich, desa boʻladi). Shunday boʻlsa-da, Entso Mareska shogirdlari "Boxing day" va undan keyingi uchrashuvlarda muvaffaqiyatsizlikka uchradi. Jumladan, jamoa oxirgi 6 ta uchrashuvning faqat bittasida zafar quchdi (22-turda "Vulverxempton"ga qarshi). Ungacha jamoa "Everton", "Kristal Pelas" hamda "Bornmut"ga qarshi uchrashuvlarda durang natija qayd etdi, "Fulxem" va "Ipsvich"ga esa magʻlub boʻldi.

Jarohatlar

"Manchester Siti"

"Manchester Siti" himoyasida jarohat bilan bogʻliq muammolar etarlicha. Jumladan, Natan Ake Parijga bormagan, Ruben Diash esa PSJga qarshi bellashuvning birinchi taymidan soʻng oʻyinni davom ettira olmasligini aytgan. Hozircha Diashning "Chelsi"ga qarshi oʻyindagi ishtiroki soʻroq ostida. Bundan tashqari, Rodri sentyabrda safdan chiqqan va taxminan aprel oyi boshlarida safga qaytishi kutilmoqda. Shuningdek, Oskar Bobb ham avgustda jarohat olgandi. Ayni damda u tiklanish jarayonining soʻnggi bosqichida va kelasi oy boshlarida oʻyinlarda ishtirok etishga tayyor boʻladi.

"Chelsi"

"Aristokratlar"dan Uesli Fofana biroz uzoqroq muddatga safdan chiqqan. Shuningdek, Benua Badiashile ham dekabr oyi oʻrtalarida safdan chiqqandi va hali mashgʻulotlarga qaytmadi. Levi Koluill, Entso Fernandes va Romeo Laviya "Siti"ga qarshi oʻynashi mumkin. Ularning jarohati u qadar ham jiddiy emas.

Taxminiy tarkiblar

Menimcha, oʻzbekistonlik muxlislar uchun eng qiziq joyiga etib keldik. Himoyadagi jarohatlar va oʻyinchilarning jismoniy holati bilan bogʻliq muammolar tufayli Abduqodir Husanovni biz mazkur bellashuvda asosiy tarkibda koʻrishimiz mumkin. "The Sporting News" nashri ham aynan shunday fikrda:

"Himoyadagi muammolar yangi kelganlar uchun imkoniyat yaratadi. Husanovning Liga 1'da toʻplagan tajribasi uni maydonga tushish ehtimoli borligini anglatadi", - deyiladi "The Sporting News" nashri yozgan maqolada.

"Manchester Siti"ning taxminiy tarkibi: Ederson, Husanov, Akanji, Lyuis, Gyundogan, De Bryuyne, Grilish, Foden, Xoland, Marmush.

"Chelsi"ning taxminiy tarkibi: Jeyms, Adarabioyo, Koluill, Kukurelya, Kaysedo, Fernandes, Madueke, Palmer, Sancho, Jekson.

Manba: Sports.uz “Zamin” yangiliklarini “Telegram”da kuzatib boring