Koʻplab nashrlar Husanovni ertaga asosiy tarkibda maydonga tushishini yozmoqda

Futbol boʻyicha APLning 23-turidan oʻrin olgan markaziy bahs 25 yanvar, shanba kuni Londonda boʻlib oʻtadi. Unda “Chelsi” oʻz uyida “Manchester Siti”ni qabul qiladi.

Koʻplab nashrlar ushbu bahsda asosiy tarkibda maydonga tushishi mumkin boʻlgan futbolchilar roʻyxatini e'lon qilmoqda. Masalan, “Sportingnews” nashri Gvardiola shogirdlari quyidagi tarkibda maydonga tushishini tahmin qilmoqda:

“Manchester Siti”ning taxminiy tarkibi (3-2-2-3, oʻngdan chapga): Ederson (darvozabon) — Husanov, Akanji, Gvardiol — Lyuis, Gundoʻgʻan — De Bryuyne, Grilish — Foden, Holand, Marmush.

Nashrning ma'lum qilishicha, Natan Ake Parijga safar qilmagan, Ruben Diash esa tanaffus vaqtida murabbiyga oʻyinni davom ettira olmasligini aytgan. Portugaliyalik markaziy himoyachining oʻrniga Jon Stouns emas, balki Riko Lyuisning tushirilgani futbolchining asosiy tarkibda oʻynashga hali tayyor emasligini koʻrsatmoqda.

Bu holat yangi oʻyinchilar Abduqodir Husanov va Vitor Reysga imkoniyat eshigini ochadi. Ayniqsa, Husanovning Liga 1 dagi tajribasi uni asosiy tarkibga qoʻshilish uchun eng real nomzodga aylantiradi.

Maydonning boshqa tomonida Jeremi Doku va Savinyoning joriy haftadagi jismoniy muammolari tufayli Umar Marmush darhol tarkibga qoʻshilishi mumkin.

Gvardiola “PSJ”ga qarshi bahsda Bernardu Silva va Mateo Kovachichning oʻyinidan noroziligini bildirgan. Gundoʻgʻan va Jek Grilish ularning oʻrnini egallashi mumkin, ammo hozircha ideal echim mavjud emas.

^{Foto: “Manchester Siti” matbuot xizmati}
“Sportsmole” nashri “Manchester Siti” jamoasi shu hafta tarkibini uchta yangi futbolchi bilan kuchaytirgani, ushbu uchlikning barchasi shanba kuni debyut qilish uchun da'vogar ekani haqida yozdi. Ammo taxminiy tarkibga yangi futbolchilarning birortasini kiritmadi:

“Manchester Siti”ning taxminiy boshlangʻich tarkibi: darvozabon—Ortega, himoyachilar—Lyuis, Stouns, Akanji, Gvardiol, yarim himoyachilar—Kovachich, Bernardu, hujumkor yarim himoyachilar—Foden, De Bryuyne, Savinyo, hujumchi—Holand.

“Standart” nashri Ruben Diash “PSJ”ga qarshi uchrashuvda jarohat olgani bois Abduqodir Husanov yoki Vitor Reys maydonda debyut qilish imkoniga ega boʻlishi mumkin ekani haqida taxmin qilmoqda. Umar Marmush ham oʻzining birinchi oʻyinini oʻtkazishi mumkin. Bundan tashqari Jon Stouns ham tayyor.

“Theanalyst” nashri Gvardiola yanvar oyida Abduqodir Husanov va Vitor Reysni qoʻshib, oʻzining himoya chizigʻini kuchaytirgani va ular shanba kuni oʻyinda maydonga tushish uchun nomzod ekani haqida yozdi. Nashr Ruben Diashning oʻyinga tushmaslik ehtimoli yuqori ekanini qayd etgan.

^{Foto: BBC}
Evropa Chempionlar Ligasining umumiy guruh bosqichida “PSJ”ga qarshi uchrashuvda maydonga tushgan Gvardiola shogirdlari 4:2 hisobida magʻlubiyatga uchradi. “Shaharliklar” 2 ta toʻp ustunligini ushlab qola olmadi. Soʻnggi turdagi gʻalabadan boshqa har qanday natija “Manchester Siti”ni musobaqa bilan xayrlashishiga sababchi boʻladi.

Ma'lumot uchun, 22 turdan soʻng “Chelsi” 40 ochko bilan APL turnir jadvalida 4-oʻrinni egallab turibdi. “Shaharliklar” 38 ochko bilan 5-oʻrinda joylashgan. Jamoalar oʻrtasidagi bahs ertaga, 25 yanvar kuni boʻlib oʻtadi. “Zamin” yangiliklarini “Telegram”da kuzatib boring