Gvardiola Husanovga tezda bajarishi kerak boʻlgan katta talabni qoʻydi

Angliya Premer-ligasi jahon futbolida eng qiyin, shiddatli va murosasiz chempionatlardan biri sifatida tan olinadi. Joriy mavsumda “Manchester Siti” natijalarining biroz pasaygani kuzatildi. Bosh murabbiy Xosep Gvardiola bu inqirozni hal qilish yoʻlini jamoaning bir necha yillar davomida oʻzgarmagan asosiy tarkibini yangilashda koʻrdi. Bu tashabbus klub rahbariyati tomonidan qoʻllab-quvvatlandi.

Shu munosabat bilan manchesterliklar qishki transferlar oynasida uch yirik transferni amalga oshirdi. Jamoa markaziy himoyaga “Lans”dan Abduqodir Husanovni, “Palmeyras”dan Vitor Reysni va “Ayntraxt” toʻpurari Umar Marmushni qoʻshib oldi. Bu oʻtkazmalar uchun 120 million funtdan ortiq mablagʻ sarflandi. Shuningdek, klub qishki transferlar oynasi yakunlangunga qadar yana yangi oʻyinchilarni jalb qilish ustida ish olib bormoqda.

Qatorga 20 yoshli markaziy himoyachi Abduqodir Husanov ham qoʻshildi. Angliya chempionligini ketma-ket toʻrt marta yutgan yagona jamoa hisoblangan “Manchester Siti”ning yangi futbolchisiga katta mas'uliyat yuklanadi.

Ingliz muxlislari oʻta talabchan boʻlib, Husanovdan jamoadagi oʻyinlari orqali oʻzini tanitib, ishonch qozonishni kutmoqda. Uning hayotida va karerasida yangi bosqich boshlandi, va bu bosqichda muvaffaqiyatga erishishi katta qiziqish bilan kuzatilmoqda.

“Shaharliklar” bosh murabbiyi Xosep Gvardiola Abduqodir Husanov haqida iliq fikr bildirib, uning jamoaga moslashuvini ijobiy baholadi:
“Abduqodir Fransiya chempionatidagi tajribasi sabab jamoamizga tez moslashdi. U tezkor va shiddatli oʻyinlarga qarshi harakat qilishni biladi. Biroq, hali hal qilinishi lozim boʻlgan muhim masala bor — u ingliz yoki frantsuz tilida erkin gaplasha olmaydi. Buni tez orada hal etishimiz kerak”, — dedi Gvardiola.

Abduqodir Husanov oʻzining professional rivojlanishi bilan diqqatga sazovor. Oʻzbekiston Superligasida birorta ham uchrashuvda qatnashmaganiga qaramay, u Belarus va Fransiya chempionatlarida muvaffaqiyat qozondi. Endi esa u zamonaviy futbolning vatani boʻlgan Angliyani zabt etishi lozim.

Xosep Gvardiola 50 million yevroga olingan himoyachiga oʻzini namoyon etish uchun etarli imkoniyat berishini ta'kidlagan. Asosiysi, Abduqodir bu imkoniyatdan foydalanib, oʻzining iqtidori va imkoniyatlarini amalda isbotlay olishi kerak. Uning iste'dodi va mehnatsevarligiga ishonib, “Manchester Siti”da muvaffaqiyat qozonishini umid qilamiz. “Zamin” yangiliklarini “Telegram”da kuzatib boring