Gvardiola Abduqodirni «Chelsi»ga qarshi oʻyinga tayyor deb hisoblamoqda

^{Foto: Getty Images}
Pep Gvardiola «Manchester Siti»ning «Chelsi»ga qarshi shanba kungi uchrashuvi oldidan matbuot anjumanida ishtirok etib, Abduqodir Husanov va jamoaning qolgan yangi oʻyinchilari haqida fikrini bildirdi.

Ispaniyalik mutaxassis tarkibdagi muammolardan kelib chiqqan holda «Siti»ning uchala yangi oʻyinchisi ham «Chelsi»ga qarshi oʻyin qaydnomasidan oʻrin olishini tasdiqladi.

«Vitor Reys yosh, uning katta potentsiali bor, ammo hali unga vaqt kerak. Abduqodir Husanov esa allaqachon moslashishga ulgurgan, u frantsuz ligasida baquvvat va tezkor oʻyinchilarga qarshi oʻynagan. Omar Marmush soʻnggi mashgʻulotimizda qatnashdi va oʻylaymanki, u ham tezda moslashadi», - dedi Pep.

«Manchester Siti» ustozi jurnalistlar savollariga javob qaytararkan, jarohatlar sababli tarkibda oʻyinchilarning etishmayotgani va yangi oʻyinchilarning yordamidan umid qilayotganini bildirdi.

«Albatta, bu oʻyinda yangi oʻyinchilar yordam berishi mumkin, ular aynan shu maqsadda taklif etilgan. «Chelsi»ga qarshi oʻyin uchun menda faqat bitta markaziy himoyachi bor. [Abduqodir] Husanovni ham hisoblasak, menda yana bir himoyachi boʻladi, «Bryugge»ga qarshi oʻyingacha esa himoyachilar koʻproq boʻlishi mumkin.

Ruben Diash va Doku jarohati sababli yordam bera olmaydi. Oʻyinlarimiz koʻpligini inobatga olgan holda, katta tarkibga ega boʻlish biz uchun muhim.

Pep Gvardiola matbuot anjumanida «Manchester Siti» uchun keyingi ikki oʻyinning muhimligini ham baholadi. 25 yanvarda «Manchester Siti» APLda «Chelsi»ga qarshi, 29 yanvarda esa EChLda «Bryugge»ga qarshi oʻynaydi.

«Bungacha bizda katta muammolar boʻlishiga qaramay, APL turnir jadvalida «Chelsi» bilan yonma-yon turibmiz. Bu juda muhim hafta boʻladi. Kelgusi ikki oʻyin biz uchun finalga tengdir. Muxlislar qoʻllab-quvvatlashi evaziga bu toʻsiqlardan muvaffaqiyatli oʻtamiz, deb umid qilaman», – deydi «Manchester Siti» bosh murabbiyi.

Ma'lumot uchun, APL 23-turi doirasidagi «Man Siti» va «Chelsi» uchrashuvi 25 yanvar, shanba kuni soat 22:30da boshlanadi. Manchester klubi 38 ochko bilan 5-oʻrinda, London jamoasi esa 40 ochko bilan 4-pogʻonadan joy olgan. EChL guruh bosqich soʻnggi turida esa «Siti» «Bryugge»ni magʻlub etibgina keyingi bosqichga yoʻllanma olishi mumkin. “Zamin” yangiliklarini “Telegram”da kuzatib boring