16:05 / 26.02.2025

Gvardiola Abduqodir Husanovning jamoaga ta'siri haqida fikr bildirdi

"Manchester Siti" bosh murabbiyi Pep Gvardiola "Tottenhem"ga qarshi oʻyin oldidan tashkil etilgan matbuot anjumanida jamoaga yangi qoʻshilgan futbolchilar haqida fikr bildirdi. Ispaniyalik mutaxassis oʻzbekistonlik himoyachi Abduqodir Husanovning jamoadagi ilk oʻyinlari va uning rivojlanishi haqida gapirdi.

Husanov jamoaga qiyin paytda qoʻshildi

Gvardiola Abduqodir Husanovning jamoaga moslashish jarayoni haqida shunday dedi:
"Husanov "Chelsi", "Leyton Oriyent", "Nyukasl", "Real" va "Liverpul"ga qarshi maydonga tushdi. U jamoaga qiyin paytda qoʻshildi. Fransiyaning oʻrta saviyadagi klubidan kelganini hisobga olsak, unga APLdagi yuqori sur'atga moslashish oson boʻlmagani aniq."

Muloqotdagi qiyinchiliklar va tez oʻrganishga intilish

Gvardiola Husanovning ingliz tilidagi tajribasi etarli emasligini ta'kidladi, bu esa uning jamoa bilan muloqotiga ta'sir qilgan.

"U hali ingliz tilini yaxshi bilmaydi. Biz unga buni tezroq oʻrganishni tavsiya qilmoqdamiz, chunki futbolda muloqot muhim ahamiyatga ega. Lekin Husanov jiddiy va kamgap yigit, shuning uchun tilni yaxshi bilganda ham uni koʻp gapiradi, deb oʻylamayman," — deya hazilomuz fikr bildirdi mutaxassis.

Gvardiola Husanovning jamoaga qoʻshgan hissasini yuqori baholadi

Gvardiola Abduqodirning himoyadagi ishonchli oʻyini va jamoaga qoʻshgan hissasini alohida ta'kidladi.
"Husanov juda muhim rol oʻynamoqda. Uning tayyorgarligi va kuchli xarakteri bizga foyda keltiryapti," — dedi Gvardiola.

Yangi transferlar haqida

Gvardiola jamoaga qoʻshilgan boshqa futbolchilar – Omar Marmush, Niko Gonsales va Vitor Reys haqida ham fikr bildirdi.
"Marmush va Gonsales hozircha kamroq oʻyin amaliyotiga ega, lekin ular oʻzlarini yaxshi koʻrsatyapti. Vitor Reys esa etarli tajriba toʻplashi kerak, u kelajakda jamoaga katta yordam beradi."

"Siti" – "Tottenhem" oʻyini oldidan

"Manchester Siti" va "Tottenhem" oʻrtasidagi uchrashuv bugun, 26 fevraldan 27 fevralga oʻtar kechasi Toshkent vaqti bilan 00:30 da start oladi. Hozirda "shaharliklar" 26 turdan keyin 44 ochko bilan 5-oʻrinda boryapti, "Tottenhem" esa 33 ochko toʻplab 13-pogʻonada joylashgan.

Gvardiola va jamoa muxlislari Husanovning ushbu oʻyinda ham ishonchli oʻyin koʻrsatishini kutishmoqda.

Futbol