21 yoshli o‘zbekistonlik himoyachi Abduqodir Husanov “Manchester Siti”dagi karyerasini juda yuqori darajada boshladi. Fransiyaning “Lans” klubidan Angliyaga kelganiga hamon olti hafta bo‘lmasdan, u nafaqat jamoa muxlislarining ishonchini qozondi, balki klub tarixidagi rekordni ham o‘rnatdi.
Fevral oyining eng yaxshi futbolchisi
Husanov fevral oyidagi “Manchester Siti”ning eng yaxshi futbolchisi deb topildi! Bu mukofot uchun o‘tkazilgan so‘rovnomada u jamoa yulduzlari Erling Xoland va Yoshko Gvardiolni ortda qoldirdi. Qiziqarli jihati shundaki, Husanov bu nominatsiyadagi so‘rovnomalar tarixida eng ko‘p ovoz to‘plagan futbolchiga aylandi. CityXtra nashri ma’lumotlariga ko‘ra, u 64 mingdan ortiq ovoz yiqqan.
Husanov “Siti”da qanday porladi?
Yanvar oyida “Manchester Siti” uni katta mablag‘ evaziga transfer qilgan edi. Bu qaror o‘zini to‘liq oqladi. Husanov qisqa vaqt ichida Angliya Premer-ligasi, mamlakat kubogi va Yevropa Chempionlar ligasida debyut qildi. Uning mahorati va maydondagi aqlli harakatlari Gvardiola jamoasida tezda e’tibor qozonishiga sabab bo‘ldi.
Qat’iyat va mahorat
Husanov o‘zining universalligi bilan muxlislarni hayratda qoldirmoqda. U himoya chizig‘ida bir nechta pozitsiyada muvaffaqiyatli o‘ynadi va har bir bahsda yuqori darajada harakat qildi:
- “Chelsi”ga qarshi debyut uchrashuvda katta bosimga qaramay, o‘yinni muvaffaqiyatli o‘tkazdi;
- Premer-ligada “Nyukasl”, “Liverpul” va “Tottenxem”ga qarshi o‘yinlarda ishonchli harakat qildi;
- Yevropa Chempionlar ligasida “Real”ga qarshi Madriddagi bahsda Vinisius Juniorni butunlay o‘yindan chiqardi.
Gvardiolaning ishonchi va kelajak bahslar
Gvardiola unga bo‘lgan ishonchini oshirib bormoqda. Bir necha murakkab uchrashuvlarda maydonga tushgan Husanovga murabbiy Angliya kubogi doirasidagi “Plimut”ga qarshi o‘yinda dam berishga qaror qildi.
8 mart kuni “Manchester Siti” juda muhim bahsda “Nottingem Forest” bilan o‘ynaydi. Bu o‘yin chempionlik kurashida hal qiluvchi bo‘lishi mumkin. Muxlislar Abduqodir Husanov yana boshlang‘ich tarkibda maydonga tushishini va yangi muvaffaqiyatlarga erishishini kutmoqda.
Husanov uchun yangi davr boshlandi
Husanovning Angliya futbolida bu qadar tez ko‘tarilishi o‘zbek futboli uchun ham ulkan g‘urur. Uning iste’dodi va mehnatsevarligi uning yangi yulduzga aylanishiga asos bo‘lib xizmat qilmoqda. Bundan buyon ham u “Manchester Siti” safida yangi rekordlarni o‘rnatishda davom etishi shubhasiz! “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
