Supergol va assist: “Turon” o‘zbek legionerlari yordamida g‘alaba qozondi

Qozog‘iston Premer-ligasining joriy mavsumida Turkiston viloyati sharafini himoya qilayotgan “Turon” jamoasi o‘zbekistonlik futbol muxlislarining diqqat markazida. Bu holatga sabab ham aniq – jamoa safida to‘rt nafar o‘zbekistonlik futbolchi: Shahboz Umarov, Odilbek Abdumajidov, Xurshid Muxtorov va yosh hujumchi Behruz Asqarov muntazam harakat qilmoqda.

Mavsumni Shahboz Umarovning gol va assisti bilan g‘alaba (2:0) bilan boshlagan “Turon”, keyingi ikki bellashuvda “Aktobe” va amaldagi chempion “Qayrat”ga qarshi o‘yinlarda 1:2 hisobida mag‘lubiyatga uchradi.

To‘rtinchi turda “Qizil-Jar” mehmoni bo‘lgan Turkiston jamoasi uchun o‘yin muvaffaqiyatsiz boshlandi – mezbonlar 36-daqiqada hisobni ochdi. Biroq to‘rt daqiqa o‘tib, Shahboz Umarov jamoadoshini ideal pozitsiyaga chiqarib, Igor Stasevichga gol urish imkonini yaratdi. Ushbu imkoniyat qo‘ldan berilinmadi va hisob 1:1 ko‘rinishiga keldi.

Biroq “Qizil-Jar” javob hujumi bilan tanaffusgacha yana bir gol urib, hisobda oldinga chiqib oldi.

Ikkinchi bo‘limda "Turon" murabbiylari o‘yinga o‘zgarish kiritish maqsadida 57-daqiqada 22 yoshli o‘zbekistonlik hujumchi Behruz Asqarovni maydonga tushirishdi. Uning maydonga tushishi hal qiluvchi omilga aylandi.

Asqarov o‘yinga qo‘shilganidan keyingi o‘n daqiqada boshi bilan jozibali gol urib, hisobni yana tenglashtirdi. Bu Behruzning Qozog‘iston chempionatidagi debyut goli bo‘ldi. U shu bilan kifoyalanmay, jamoa hujumlarida faol ishtirok etdi va o‘yin oxirida Luka Zagurskiyni golli vaziyatga chiqarib berdi. Rossiyalik hujumchi bu imkoniyatni qo‘ldan chiqarmadi va “Turon”ning g‘alabali goliga mualliflik qildi — 3:2!

Shu kuni “Turon” safidagi barcha o‘zbek legionerlari – Shahboz Umarov, Odilbek Abdumajidov va Xurshid Muxtorov to‘liq harakat qildi.

Ushbu g‘alabadan so‘ng “Turon” jamg‘argan ochkolar sonini 6 taga yetkazdi va chempionatda yuqori pog‘onalar sari harakatni boshladi.

Endi turkistonliklar beshinchi tur doirasida 19 aprel kuni o‘z maydonida Qozog‘istonning top jamoalaridan biri – “Astana”ni qabul qiladi. Ko‘zlar yana o‘zbek futbolchilarining harakatlarida bo‘ladi. “Zamin” yangiliklarini “Telegram”da kuzatib boring