15 282
Yevropa futbolidagi qudratli jamoalar orasida bu mavsum eng ko‘p muhokamalarga sabab bo‘layotgan klub — shubhasiz, “Manchester Siti”. Gvardiola boshchiligidagi jamoa oxirgi to‘rt yilda Angliya chempionligini biror marta qo‘ldan chiqarmagan holda “APL”da mutlaq hukmronlik qilib kelayotgandi. Biroq joriy mavsumning birinchi yarmida shaharliklar mexanizmida jiddiy nosozlik yuz berdi.
Inqirozga qarshi transferlar: Abduqodir Husanov va yangi qon
Klub rahbariyati yozda emas, qishdayoq katta islohot boshlashga qaror qildi. Tarkibni yangilash maqsadida 210 million yevroga Abduqodir Husanov, Umar Marmush, Niko Gonsales va Viktor Reys jamoaga qo‘shildi. Shu bilan “Siti” qishki transferlar davrida Yevropaning eng ko‘p xarajat qilgan klubiga aylandi.
Xususan, O‘zbekiston futbol muxlislari uchun e’tiborli jihat — Abduqodir Husanovning katta bosqichga chiqqani bo‘ldi. Uning “Siti” safidagi ilk daqiqalaridayoq Erling Xoland singari yulduzlar uni dalda bilan qo‘llab-quvvatlagani diqqatga sazovor.
Xoland ketadimi? “Siti”da xavotir kuchaymoqda
Biroq jamoa ichida hammasi ham ideal emas. Xususan, to‘purar Erling Xolandning ketishi mumkinligi haqidagi xabarlar klub atrofini larzaga solmoqda. Ispaniyaning “El Nacional” nashriga ko‘ra, norvegiyalik yulduz “Siti” kelajagiga bo‘lgan ishonchini yo‘qotmoqda.
“Gollar urayotgan futbolchi sovrinlarsiz yura olmaydi”, – deb yozadi tahlilchilar. Bu fikrda jon bor: Ronaldu va Messi misolida ham bunday xolatni ko‘rganmiz.
Xoland ketsa, Husanovga qanchalik ta’sir qiladi?
Eng qiziq jihat — Xoland ketsa, bu vaziyat Abduqodir Husanovga qanday ta’sir qiladi? Sababi, Husanov “Siti”dagi dastlabki kunlarida aynan Xolanddan katta ruhiy qo‘llab-quvvatlov oldi. U xatoga yo‘l qo‘ygan paytlarda ham, g‘alabalarda ham to‘purar uni yolg‘iz qoldirmadi. Bunday futbolchi bilan bir jamoada bo‘lish — yosh o‘yinchi uchun katta omad.
PSJ, “Bavariya” va “Real” kuzatuvda
Endi esa “Pari Sen-Jermen”, “Bavariya” va “Real Madrid” Xoland atrofidagi vaziyatni sinchkovlik bilan kuzatmoqda. Ayniqsa, “Real” — Mbappe va Xoland duetini yaratish rejasidan hali ham voz kechmagan. Agar Erling ketsa, bu nafaqat “Siti”, balki butun Angliya futboli uchun kuchli silkinish bo‘ladi.
“Siti” rejasi: yoshlar bilan yangi davr?
Klub esa yo‘lni tanlagan: keksa yulduzlar o‘rniga yosh, chaqqon, g‘alabaga chanqoq talantlar bilan yangi bosqich boshlanmoqda. Bu loyiha qanchalik samarali bo‘ladi — vaqt ko‘rsatadi.
Xulosa: “Manchester Siti”da sinovli kunlar. Xoland qoladimi, ketadimi? Abduqodir Husanov qanday o‘yin ko‘rsatadi? Javoblar yaqin haftalarda aniq bo‘ladi. Muxlis sifatida biz esa kuzatishda davom etamiz!
Fikringiz qanday, aziz muxlis? Xoland ketsa, “Siti” qanchalik o‘zgaradi? Husanovga ta’sir qiladimi? “Zamin”ni Telegramʻda oʻqing!
23:46, 5-04-2025
