G‘alaba va mag‘lubiyat nimaligini bilmayotgan jamoalarning o‘yini qiziqmi?

2-4 may kunlari Superligada 8-tur o‘yinlari o‘tkaziladi. Rejalashtirilgan 8 ta o‘yin ham o‘ziga xos intrigalarga sabab bo‘lmoqda. Har bir uchrashuvga e’tibor chindan yuqori. Quyida ushbu juftliklar o‘rtasida bo‘lib o‘tadigan o‘yinlar haqida mutaxassis fikrlari bilan tanishishingiz mumkin.

2 may

18:15. “Xorazm” – “Nasaf”

Turni “Xorazm” – “Nasaf” qarama-qarshiligi boshlab beradi. Jizzaxda bo‘lib o‘tadigan bahsda “Xorazm” nominal mezbon vazifasida bo‘ladi. Qiziqarli intriga. Hakim Fuzaylov jamoasi oxirgi bor ikkinchi turda “Surxon” ustidan g‘alaba qozongan. Shundan beri ular muxlislarini xursand qila olmayapti. “Nasaf” ushbu uchrashuv favoriti hisoblanadi. “Xorazm” bu o‘yinda durang o‘ynasa ham ijobiy natija sifatida qabul qilinishi tabiiy.

20:30. “Bunyodkor” – “Qo‘qon-1912”

Ilyos Zeytullayev jamoasi yaxshi taassurot qoldiryapti. O‘tgan turda mag‘lubiyat nimaligini bilmay kelayotgan OKMKni mag‘lub etishdi. “Bunyodkor” ham hali chempionatda yutqazgani yo‘q. Pro ligadan Superligaga qaytgan jamoalar orasida “Qo‘qon-1912”ning o‘yini ancha tajovuzkor ko‘rinyapti. Shu bois “Bunyodkor” maydonida keskin ruhdagi uchrashuv guvohiga aylanamiz. Kichik ustunlik esa mezbonlarda.

3 may

18:00. “Buxoro” – “Mash’al”

O‘tgan yili pro ligada kurash olib borishgan bu ikki klub endi Superligada o‘zaro to‘qnash keladilar. “Buxoro” o‘tgan turda Namanganda yirik hisobda imkoniyatni boy bergach, bosh murabbiy Ulug‘bek Baqoyev rahbariyatdan iste’fo so‘rashi haqida matbuot anjumanida aytib o‘tgandi. Ammo hozircha bu narsa ro‘y bermadi va uning o‘zi jamoani o‘yinga tayyorlamoqda. “Mash’al”ga qarshi uchrashuvda “Buxoro”ni g‘alabadan boshqasi qanoatlantirmaydi. Muborakliklar ham sovg‘a emas. Imkoniyatlar teng baholanmoqda.

19:30. OKMK – “Andijon”

Bizni yana bir qiziqarli bellashuv kutmoqda. Oxirgi paytlarda mag‘lubiyatlar girdobiga tushib qolgan “Andijon” bu safar Olmaliqda Mirjalol Qosimov boshchilik qilayotgan OKMKga qarshi maydonga tushadi. Bu o‘yinda jamoalarning ruhiy tayyorgarligi asosiy o‘ringa chiqadi. O‘tgan turda ikkalasi ham mag‘lubiyatga uchrashdi. Muxlislarni juda keskin ruhdagi bellashuv kutmoqda.

20:15. “Surxon” – “Paxtakor”

Turning markaziy uchrashuvlaridan biri desak adashmagan bo‘lamiz. “Paxtakor” omadsiz startdan keyin endi o‘ziga kelayotganga o‘xshayapti. Biroq ularni Termizda og‘ir o‘yin kutayotganiga shubha yo‘q. “Surxon”da ham, “Paxtakor”da ham chempionatda hozirgacha 4 ta mag‘lubiyat bor. “Surxon” o‘z uyida kuchli raqibga qarshi ochiq jang taklif qiladimi yoki yopiq o‘yin ko‘rsatib, qarshi hujumlardan omadini izlaydimi? “Paxtakor” esa hujumkor o‘yin ko‘rsatishi aniq. Hozircha imkoniyatlar teng!

4 may

18:00. “Neftchi” – “So‘g‘diyona”

Vitaliy Levchenko jamoasi bu safar Ivan Boshkovich boshchiligidagi “So‘g‘diyona”ga qarshi bahs olib boradi. Jiddiy o‘yin bo‘ladi. Chempionlik uchun kurashayotgan “Neftchi” o‘tgan safar uyida “Paxtakor”ga 0:4 hisobida mag‘lubiyatga uchragach, muxlislarini qattiq ranjitib qo‘ygandi. Farg‘onaliklarning o‘tgan turda Samarqandda “Dinamo”ga qarshi bo‘lib o‘tishi kerak bo‘lgan uchrashuvi qoldirilgan. Levchenko jamoasi bor e’tiborini “So‘g‘diyona” bilan o‘yinga qaratgan. Bu safar ham ochko yo‘qotsa Levchenkoga yana tanqid toshlari otiladi. Lekin Boshkovich jamoasini yengish oson ish emas.

19:00. “Qizilqum” - “Navbahor”

Nihoyat, “Qizilqum” jamoasi o‘z uyiga – Navoiyga qaytmoqda. 4 may kuni “Navbahor”ga qarshi bellashuv “Yoshlar sport majmuasi”da bo‘lib o‘tadi. “Qizilqum” o‘tgan turda Qarshida “Nasaf”dan javobsiz 4 ta gol o‘tkazib yuborgandi. Bu safar esa o‘z uyidagi ochilish o‘yinida navoiyliklar ishqibozlari ko‘z o‘ngida ijobiy natija uchun bor kuchini sarflashi shubhasiz.

20:15. “Sho‘rtan” – “Dinamo”

Superligada g‘alaba qozonmagan birgina “Sho‘rtan” qoldi. To‘g‘ri, yaqinda O‘zbekiston Kubogi guruh bosqichida "Sho‘rtan" "Olimpik"ni qabul qilib 3:0 hisobida ustun keldi. Lekin hali chempionatda bunday ishni uddalay olmayapti. Anvar Berdiyev jamoasi bu mavsumda hali mag‘lubiyatga uchramagan “Dinamo”ni yengishga urinib ko‘radi. G‘uzorliklar o‘z uyiga qaytdi va muxlislari ko‘z o‘ngida o‘ynaydi. Lekin Vadim Abramov jamoasi ancha xavfli va hujumkor o‘yin namoyish qilyapti. Tajriba borasida “Dinamo” ustunroq. “Sho‘rtan” esa katta ishtiyoq evaziga nimagadir erishishi mumkin, qolganini vaqt ko‘rsatadi. “Zamin”ni Telegramʻda oʻqing!